Татарстанда яшьләр сәясәте лидерлары арасында социаль ипотека буенча 49 фатир уйнатылачак

Бүгенге көннән Татарстанда социаль ипотека программасы буенча торак алу өчен яшьләр сәясәте лидерлары арасында конкурсның заявка кампаниясе ачылды. Бу хакта бүген «Татар-информ» мәгълүмат агентлыгында узган матбугат конференциясендә ТР Яшьләр эшләре буенча министрының беренче урынбасары Тимур Сөләйманов хәбәр итте.

«Конкурс республикада 2011 елдан бирле үткәрелә. Быелдан студентлар, аспирантлар, яшь белгечләр социаль ипотека буенча ташламалы шартларда торак алуга дәгъва итә алалар. Төп шарт - үз вузларында, районда, учреждениедә яшьләр сәясәтен тормышка ашыруда катнашу. Конкурста 18 яшьтән 30 яшькә кадәр булган яшь кешеләр катнаша ала, аларның торак хокуклары объектларында гаиләнең бер әгъзасына гомуми мәйданы 18 квадрат метрдан ким булырга тиеш», — диде ул.

Спикер билгеләп үткәнчә, социаль сораштыру мәгълүматларына караганда, 30 яшькә кадәрге кешеләрнең 60%тан артыгы торак мәсьәләсен хәл итүдә яшьләргә ярдәм күрсәтүдә дәүләтнең төп ролен күрә.

Ел саен конкурс нәтиҗәләре буенча социаль ипотека программасында катнашу хокукына ия булган 49 җиңүче билгеләнә. Элекке еллар нәтиҗәләре буенча 245 җиңүче фатирларга ия булды. Заявка кампаниясе 2020 елның 31 июленә кадәр дәвам итәчәк.

Фото: Султан Исхаков

Чыганак: tatar-inform.ru