Тукай әдәби музее «Ядкярләрдә Тукай рухы» әдәби конкурсында катнашырга чакыра

Фото: © «Татар-информ», Рамил Гали

«Конкурста Габдулла Тукайның Казандагы әдәби музеенда саклана торган шәхси ядкярләре турында яңа әсәр (шигырь, поэма, хикәя) иҗат иткән 1-11 сыйныф укучылары һәм студентлар катнаша ала. Эшләр 2025 елның 15 мартыннан 9 апреленә кадәр «Ломоносов» фәнни сервисы буенча кабул ителә. Конкурс «Проза» һәм «Поэзия» номинацияләрендә рус һәм татар телендә уздырыла», – дип хәбәр итте «Татар-информ»га музейның матбугат хезмәте.

Иҗади эшләр шагыйрьнең Габдулла Тукай әдәби музее экспозициясендәге мемориаль әйберләренә багышланган булырга тиеш: мемориаль экспонатлар персонаж, әдәби образ һ.б. сурәтләнергә мөмкин. Килгән эшләрне бәяләгәндә Тукай мемориаль әйберләре турында мәгълүмат бирү, теманы ачу, жанрга туры килү, әдәби тасвирлау чараларын куллану, мөстәкыйльлек, яңалык һәм оригинальлек исәпкә алына.

Җиңүчеләрне бүләкләү чарасы 26 апрельдә Габдулла Тукай әдәби музеенда уздырылачак. Катнашучыларга сертификатлар электрон почтадан җибәреләчәк.

Кызыклы яңалыкларны күзәтеп бару өчен Телеграм-каналга язылыгыз

#Габдулла Тукай #Габдулла Тукай музее

Тулырак: https://tatar-inform.tatar/news/tukai-adabi-muzee-yadkyarlarda-tukai-ruxy-adabi-konkursynda-katnasyrga-cakyra-5901653