Тынычлыкта калдыр, реклама!
Рекламаны чикләмәкчеләр. Россия Дәүләт Думасы депутатлары, якшәмбе көнне теле- һәм радиотапшыруларны өзлексез күрсәтергә кирәк, дип тәкъдим иткән. Яңа канун проектын шушы арада ук карап тикшерергә җыеналар.
Әйтүләренә караганда, ялларда халык рәхәтләнеп ял итәргә тиеш. Шул исәптән телевизор каршысында да. Ә берөзлексез кабатланып торучы реклама чыгарылышлары исә төрле авырулар, проблемалар турында искә төшереп тора, дигәннәр. Өстәвенә шимбә-якшәмбедә балалар да телевизорга “чума”. Реклама аларга чынбарлыкны дөрес кабул итәргә комачаулый, дип тә өстәгәннәр. Яңалыкны тәкъдим итүчеләр фикеренчә, ял көннәрендә теле- һәм радиотапшырулар вакытында реклама чыгарылышлары күрсәтүне, гомумән, тыярга кирәк. Әлеге чикләү якшәмбе көнне иртәнге сәгать алтыдан алып төнге сәгать уникегә кадәр дәвам итәчәк дип көтелә.
Гаилә психологы Елена Шамова сүзләренә караганда, реклама карау чыннан да ярсу хисе тудырырга мөмкин. Бигрәк тә яратып караган сериал арасында гел кабатланып торганы. “Сыйфатсыз реклама да кеше психикасына начар тәэсир итә”, – ди белгеч. Аларның кайсысы яхшы, кайсысы начар икәне генә билгесез.
Илдә үткәрелгән соңгы сораштыруларның берсеннән күренгәнчә, Россиядә яшәүче һәр өч кешенең берсе буш вакытын телевизор каршында үткәрә. Андыйлар пенсионерлар арасында күбрәк. Өлкән яшьтәгеләрнең һәр икенчесе телевизор пультын кулдан төшермәвен белдергән. Ә 18–24 яшьлекләр арасында әлеге күрсәткеч 10 проценттан да кимрәк. Дөрес, бу тынычланырга сәбәп түгел. Яшьләр күбрәк смартфон, гаджетлар белән “җенләнә”. ”Буш вакытта нәрсә эшлисез?” – дигән сорауга респондентларның күбесе: ”Өйдәге вак-төяк мәшәкатьләрне башкарам, бала белән вакыт үткәрергә тырышам, бакчада казынам”, – дигән. Соңгы җиде елда илдә телевизор карарга яратучылар ике тапкыр кимегән.
Фото: https://pixabay.com | kalilapinto
Следите за самым важным и интересным в Telegram-каналеТатмедиа
Нет комментариев