“Аеклык ноктасы” проекты дәвам итә

Әлеге проблеманы хәл итү өчен Татарстанда 2015 елдан «Аеклык ноктасы» пилот  проекты гамәлгә ашырыла. Әлеге медик-социаль программа иң беренче чиратта эчкече аналарны дәвалауга йөз тота. Аларның үз балаларын тәрбияләвен дәвам итүгә омтылышы  сакланып  калырга тиеш. Проектны гамәлгә  ашыруда җаваплылык  үзәге булып республка нарко­логия хезмәте санала. Аның бурычы  –  үз-үзеңне дәвалауны  мотивацияләүгә юнәлдерелгән  эш оештыру, ата-аналарның  бала тәрбияләү хокукларын  сак­лап  калу, гаиләне ныгыту. “Аеклык ноктасы” проекты ни­гезендә дәвалау дару препаратлары куллануны,  психологлар, психотерапевтлар,  социаль эш буенча белгечләр ярдәмен һәм эчкече аналарның  ярты еллык  курслар үткәреп, алкогольгә бәйлелектән йолып калуны  күздә тота. Татарстанда исерткеч эчемлекләрне куллану  масштаб­ларын киметү буенча  күрелгән чараларга  карамастан, әле хә­мер сату   күрсәткечләре югары булып кала.  Республикада ел  саен  беренче  тапкыр “алкоголизм”  диагнозы куелып,  1600-1800  кеше  диспансер  учетка  алына.  Инде сатып  алынган  чир белән  авыручылар  саны 28 меңгә җиткән һәм 2 меңнән  артык кешене психозлы “ак кызышу”  газаплый. Хатын-кызлар,  бигрәк тә яшьрәкләре  арасында    хәвефле тенденция  саклана. Алар 2024 елда  алкоголизм белән авыручыларның 23,9 процентын тәшкил иткән. Амбулатор һәм  стационар дәвалануга  мохтаҗ хатын-кызлар  саны ел саен арта бара.

Быел социаль ятимлелекне профилактикалау буенча “Аеклык ноктасы” проектында  республикада 200 кеше катнашачак. Болар 45 яшьләре тулмаган яшь әтиләр һәм әниләр. Ирле-хатынлы дәваланучылар  да бар. Сабадан районның балигъ булмаганнарның  эшләре һәм  алар­ның хокукларын  яклау  ко­миссиясе карары нигезендә  исем­леккә 4 кеше  кертелгән. Алар балигъ булмаган балалары булган аналар. 2024 елда районнан   3 кеше курслар  үтте.

  Илшат Мортазин,

район үзәк хастаханәсе табиб-наркологы.