Басуда техника гөрли: Симетлеләр терлек азыгын сыйфатлы итеп әзерлиләр

«Симет» җаваплылыгы чикләнгән җәмгыятендә кызу эш өсте — хуҗалыкта бар куәткә терлек азыгы әзерләү кампаниясе дәвам итә. Иртә таңнан караңгы төнгә кадәр басу-кырларда техника гөрли, бөтен коллектив бердәм булып малларны кышлату чорына мул запас туплау өчен тырыша.

Бүгенге көндә игенчеләр сенаж өчен беръеллык һәм күпьеллык үләннәрнең икенче каты культураларын җыю белән мәшгуль. Хуҗалыкның баш агрономы билгеләп үткәнчә, быелгы җәй дымлы булу сәбәпле, үләннәр бик яхшы үскән, яшел масса күләме узган елгы күрсәткечләрдән югарырак. Бу исә сыйфатлы сөт һәм ит җитештерү өчен ныклы нигез булачак.

Басуда куәтле «Ягуар», «Полесье» кебек заманча комбайнар эшли. Алар теземнәргә салынган массаны ваклап, махсус зур йөк машиналарына бушаталар. Комбайннар артыннан ук теземнәрне рулоннарга төрү пресс-җыйгычлары бара. Басу читендә инде дистәләгән тонна печән һәм сенаж төялгән эскертләр калкып чыккан. Транспорт звеносының эше аеруча җаваплы: алар басудан ындыр табагына яшел массаны өзлексез ташып торырга тиешләр. Монда югалтуларга юл куймыйча, минутны да әрәм итми эшләү сорала.

Хуҗалык җитәкчесе Рәис Фәизов хезмәткәрләр алдында катгый бурыч куйган:

Терлек азыгы — киләсе ел уңышының нигезе. Безнең максат — һәр шартлы баш терлеккә кимендә 35–40 центнер азык берәмлеге туплау. Шуңа күрә һава торышы яхшы торганда, һәр сәгатьне файдаланып калырга кирәк. Яшел массаның дымлылыгын лаборатория белгечләре даими тикшереп тора, чөнки сыйфатлы сенаж салу өчен ул нәкъ менә тиешле дәрәҗәдә булырга тиеш.

Барлык хезмәткәрләр дә һава торышы яхшы булудан файдаланып, терлек азыгын җитәрлек күләмдә генә түгел, ә югары сыйфатлы итеп әзерләргә тырышалар. Механизаторлар ике сменада эшлиләр, техника төзексезлегенә юл куймас өчен, ремонт бригадалары тәүлек әйләнәсе дежур тора. Аш-су осталары басуда эшләүчеләрне кайнар һәм тәмле ризык белән сыйлый, шуңа күрә егетләрнең күңелләре көр, кәефләре күтәренке.

«Симет»леләргә коры һава, ватылмый эшләүче техника һәм имин хезмәт теләп калабыз! Урып-җыю кампаниясе ахырына кадәр шушы темпны саклап, планнарын арттырып үтәүләренә ышанабыз.