Берлинны алган каһарман

   1945 елның 2 маенда Берлин гарнизоны тар-мар ителә. Әсирлеккә 480 мең немец солдаты алына, 1550 танк һәм башка күп техника кулга төшерелә. Берлинга барып җитүчеләр арасында 1913  елда Кырбаш  авылында туган Семен Прокофьевич Константинов та була.
1941  елның  көзендә  Кызыл  Армия сафларына алынган  егет 120 миллиметрлы миномет батареясында артиллерия разведчигы булып хезмәт итә башлый. Яңа белгечлек үзләштергәч, 3нче Украина  фронтының  60нчы  укчы дивизиясе 185нче полкына билгеләнә. Днепр өчен барган сугышларда каты яралана. Озак вакыт госпитальдә дәвалангач, 1944  елда  кабат  сафка баса. Аларның  полкы  Белоруссия  фронтына  күчерелә һәм рядовой Семен Константинов Висла-Одер һөҗүм операциясендә катнаша. Дошман оборонасын өзүдәге кыюлыгы  өчен Башкомандующий боерыгы нигезендә  аңа Рәхмәт белдерелә һәм  “Батырлык  өчен”  медале тапшырыла.  Кырбаш егете  Сохачев, Скерневице, Лович,  Влославск,  Гнезно һәм башка  шәһәрләрне азат итүдә  катнаша. Берлин операциясе  башлангач, 185нче  укчы полк беренче  эшелонга куела.  Ике батальон  17 апрельдә Альте-Одер  елгасын кичүгә керешә, шул ук кичтә Нейхаф, Ной-Хардберг яулап алына. Семен Константинов 17-26  апрельләрдә Берлинның  күп  кварталларын  азат итүчеләр  сафында була. Хенов  кварталында 17  немец  солдатын әсирлеккә төшерәләр. Сугышта төрле хәл килеп чыга: 26 апрельдә безнең реактив артиллерия   ялгышлык белән  185нче полкның  команда пунктын утка тота. Һәлак булучылар 6, яраланучылар 48гә  җитә. Бу очрактан соң полкны ул позициядән алалар һәм 295нче дивизиянең 1042нче укчы полкына тапшыралар. Сугышка нокта  куелганда 185нчы  полк Рейхстагтан берничә  йөз  метр ераклыкта була. Полк 40  солдатын  югалта, 181е  яралана. Семен  Константинов “За  отвагу”, “За освобождение Варшавы”, “За  взятие Берлина”, “За  победу над Германии”  медальләре,  I дәрәҗә Ватан сугышы ордены белән  бүләкләнә. Ул  хезмәт иткән  185нче гвардия  укчы полкы 2008 елда гына таратыла,  сугышчан байраклары  музейга тапшырыла.
Семен Прокофьевич Константинов өчен  армия  хезмәте 1945 елның августында тәмамлана. Сугыштан соң ул Киров исемендәге  колхозда балта остасы булып  эшли. Авылдашы Нина Кирилловна  белән гаилә корып,  8 бала  үстерәләр.  Хәзерге  көндә аларның җидесе  исән-сау.  Берлин операциясе каһарманы 1987 елда фани дөньядан бакыйлыкка күчте, Кырбаш зиратына җирләнде. Фронтовик авылдашыбызның рухы шат булсын. Ә Нина Константинова исән-сау, аңа быел 99 яшь тулачак. Ул  фронтовикның тол хатыны буларак, хөкүмәт  салган  йортта улы Анатолий белән яши.
Фидаил Шәехов.
Кырбаш.