«Фотодагы гүзәл затларны таныйсызмы?»

   Хөрмәтле дуслар! Хәтерегездә булса, газетабызның 5 март санында  районыбызның төрле тармагында хезмәт куйган күркәм хатын-кызларыбызның кечкенә чакта төшкән фотоларын тәкъдим иткән идек. Конкурс шартлары буенча сез әлеге ханымнарны танып, исемнәрен безгә язып җибәрергә тиеш идегез. Конкурс  күпләрдә кызыксыну уятты. Җавапларны электрон почта аша да кабул иттек, телеграмм, Вконтакте челтәре аша язып җибәрүчеләр дә булды. Конкурс төгәлләнергә бер көн калгач, безгә, ниһаять, дөрес җавап килеп иреште. Сабадан Алинә Ибраһимова 6 хатын-кызны да танып, дөрес җавапларын Вконтакте челтәре аша җиткерде. Газетабыз мөхәррире Рөстәм Исмәгыйлов җиңүчегә конкурсыбызның төп иганәчесе Сабадагы фрешмаркет кибетеннән 1,5 мең сумлык сертификат  тапшырды.

“Мин табигатем белән азартлы кеше, бу конкурста да дөрес җавапны тапканчы тырышасы булды. Кемлеген белмичә икеләнеп торган кешенең берсе –үземнең җитәкчемнең кечкенә чагы, ә икенче ханым- әниемнәрнең урам күршесе булып чыкты. Бүләгегез өчен зур рәхмәт! Фрешмаркет сабалыларның яратып йөри торган урыны, алардан бүләк отуыма чиксез шатмын!”, – диде җиңүче.

Ә без үз чиратыбызда барлык катнашучыларга зур рәхмәтебезне җиткерәбез. Мондый бәйгеләрдә алга таба да катнашырсыз дип өмет­ләнәбез, ара­­лашып яшик!