Капка төбендә — җыр-моң: Туктар авылы халкы элекке кич утыру традицияләрен яңартты

  20 июль көнне Туктар авылы клубы каршындагы ямьле болында, клуб мөдире  һәм китапханәче тарафыннан «Яшьлегемә кайтыр идем...» дип исемләнгән матур кич утыру оештырылды. Бу чара элеккеге авыл гадәтләрен яңарту — җәйге челләдә, печәнгә төшүчеләр кайткач, капка төпләрендә җыелып, самавыр чәе эчеп, рәхәтләнеп аралашу традициясен искә алу максаты белән үткәрелде.

Кичке салкынча җил истә, күктә йолдызлар кабынды. Авыл өстенә гармун моңнары таралды. Клубның үзешчән баянисты өздереп татар халык көйләрен уйный башлагач, уртага иң актив авылдашлар чыкты. Онытылып барган такмаклар яңгырады, дәртле биюләр оештырылды. Яшь буын вәкилләре дә читтә калмады: алар өлкәннәр белән бергә түгәрәк уенга кушылдылар, заманча җырларга парлап биеделәр.

Уен-көлке арасында авыл халкы зур самавырдан ясалган хуш исле үләнле чәй эчеп, тәм-томнардан авыз итте. Китапханәче әзерләгән викторина сораулары барысына да бик ошады: кемдер яшьлегендә булган кызыклы вакыйгаларны сөйләде, кемдер инде онытыла башлаган борынгы җыр сүзләрен искә төшерде. Капка төбендәге бу очрашу һәркемнең күңеленә сары май булып ятты, чөнки мондый ихлас аралашулар хәзерге тиз ритмлы тормышта бик сирәк була.

«Без яшь чакларда шулай җыела идек. Бүген тагын шул елларга кайткандай булдым, рәхмәт оештыручыларга», — диде кичәдә катнашучы Ак әбиләрнең берсе, күзләрендә шатлык яшьләре ялтырап. Икенчеләре исә гитара кылларын чиертеп, яшьлек мәхәббәт җырларын суздылар.

«Капка төбендә кич утырулар озак еллар дәвамында өзелмәсен иде», — дигән теләкләрен җиткерделәр авылдашлар. Күңелләрдә якты тойгылар калдырып, күтәренке кәеф белән, кичке унберләр тирәсендә генә өйләренә таралышты халык.