Күз буенча инвалидлар киңәште
Бөтенроссия сукырлар җәмгыятенең Саба районара оешмасында 333 кеше исәптә тора. Алар – Саба, Теләче һәм Кукмара районнарында яшәүчеләр.
Бу атнада оешма рәисе Рәмзия Галимова күз буенча инвалидлар белән устав таләпләре нигезендә 2018 елның сентябреннән алып, хәзерге чорга кадәр башкарылган эшләр турында хисап тотты. “Оешмада исәптә торучыларның, бигрәк тә ялгыз яшәүчеләрнең көнкүреш хәлләрен белешәбез. Нинди булышлык кирәклеген ачыклап, үзләре эшләгән предприятие җитәкчеләренә, район башлыкларына мөрәҗәгать итәбез. Бу эшләрне башкаруда урыннарда группорглар, контроль-ревизия комиссиясе әгъзалары булыша”,– диде рәис. Оешмага керү күпләр өчен аралашу мөмкинлеге дә. “Мин аралашырга яратам, спорт ярышларында катнашам. Казанга җыелышларга барсам, башка районнардан килүчеләр белән танышам. Гомумән, аралашу өлкәннәргә аеруча кирәк, кайчак сөйләшеп китәсең дә, проблемаңны хәл итү юлы да табылып куя”,–ди балачагында бер күзенең күрү сәләтен югалткан Фәния Шәмсетдинова. Җыелышта катнашучылар шәхси тернәкләнү программасы документы рәсмиләштерүгә, торак шартларын яхшырту өчен ташламалы кредит алуга бәйле сораулар күтәрделәр. Аннары “Кайгырту” фонды ярдәме белән юбилярларны, төрле чараларда катнашучы активистларны котлау булды. Җыелышта Теләче һәм Кукмара районнары хакимиятләренең районара оешма мөрәҗәгатьләрен еш кына җавапсыз калдырулары турында әйтелде.
Фәнил Мәүлетов фотолары
Следите за самым важным и интересным в Telegram-каналеТатмедиа
Нет комментариев