РӨСТӘМ МИҢНЕХАНОВ РАЙОНЫБЫЗДА БУЛДЫ
Авыл хуҗалыгы һәм азык-төлек идарәсенең 6 майга булган мәгълүматына караганда, район буенча 4880 гектарда арпа, 688 гектарда солы, 687 гектарда бодай, 310 гектарда борчак, 631 гектарда азык катнашмасы, берьеллык һәм күпьеллык культуралар чәчелгән. Аерым хуҗалыклар буенча алганда, “Игенче” җәмгыятендә 876 гектарда, ягъни барлык мәйданнарның 33 процентында эш башкарылган. “Туган як”та сабан культуралары чәчү – 770, “Мөхәммәтшин” хуҗалыгында 722 гектарда үткәрелгән. “Шытсу” предприятиесендә – 135 гектарда арпа һәм 50 борчак, “Курсабаш” җәмгыятендә 75 гектарда арпа чәчкәннәр.
Кичә районыбызда чәчү кампаниясе белән вертолетта очып Татарстан Президенты Рөстәм Миңнеханов та танышты. Чулпыч авылы янында авыл хуҗалыгы предприятиеләре җитәкчеләре, авыл җирлекләре башлыклары белән очрашып, кыр эшләре барышы, аграрийларның моң-зарлары белән кызыксынды. “Хуҗалыкларда быел субсидияләр хисабына җитәрлек күләмдә ашлама тупланды. Моның өчен республика җитәкчелегенә зур рәхмәт”,– дип билгеләп үтте район башлыгы Рәис Миңнеханов. “Нәтиҗәлелек күрсәтеп, чәчүне ахырына җиткерергә кирәк. Эшләрегез күп, әлегә 33 процент кына башкарылган”,– дип бәя бирде Президент. Авыл хуҗалыгы һәм азык-төлек министры Марат Әхмәтов Саба районындагы җирләрдә уңышның бары хезмәт белән генә алынуына басым ясады. Рөстәм Миңнеханов җитәкчеләр белән очрашуда авылда яшәүчеләргә торак төзелеше алып баруда дәүләт ярдәме, аның формаларын камилләштерү хакында сөйләшүләр алып барды. Чулпыч авылы янындагы роботлаштырылган сөтчелек комплексы төзелешенең барышы белән кызыксынды.
Фәнил Мәүлетов фотолары
Следите за самым важным и интересным в Telegram-каналеТатмедиа
Нет комментариев