Шикле шофер медицина тикшерүеннән баш тарта һәм...

Аек булуы шик тудырган машина   йөртүче медицина тикшерүеннән баш тартса, ул автомат рәвештә хокук бозучылар категориясенә күчә. Әмма машина руле артына утыручылар бу турыда онытып җибәрәләр.
Агымдагы  елның 5 гыйнварында көндезге  сәгать  2дә Сатыш-Саба юлында  юл-патруль хезмәте инспекторы Саба районында  яшәүче Р.Н.Гәрәев идарә иткән  машинаны туктата. Аек түгеллеге сизелеп торса да,  ул инспекторның медицина тикшерүе узу турындагы законлы таләбеннән баш тарта. Аңа беркетмә нәкъ шуның  өчен төзелә һәм машина белән идарә итүдән читләштерелә.
Саба район җәмәгать  судьясы суды ир-атны КоАПның 12.26 статьясында каралган хокук бозуда гаепле дип тапты.  Әлеге статья нигезендә машина йөртүчегә  исереклек хәләтен ачыклауга медицина тикшерүе узудан баш тарткан өчен җәза билгеләнә.
Суд гаепләнүчене ел ярымга транспорт чаралары белән идарә итү хокукыннан мәхрүм итте. Руслан Гәрәев шулай ук 45 мең сум күләмендә штраф түләргә тиеш булачак.