Саба, Шәмәрдән кешеләре исерек хәлдә машина йөрт­кәндә тоткарланганнар [исемлек]

Ел саен республикада 10 меңнән артык исерек йөртүче "права"сыннан мәхрүм ителүгә карамастан, андыйларның саны кимеми. Районыбызда да шундый вәзгыять күзәтелә. Май ае статистикасына күз салыйк.

1 майда Шәмәрдәндә яшәүче Н., автомобиль йөртү таныклыгын аңар­чы ук алдырган була торып, авыл ура­мында исерек хәлдә машина йөрт­кәндә тоткарлана.

15 майда шул ук Шәмәрдән кешесе Н.га аек түгел хәлдә автомобиль йөрткән өчен кабат беркетмә төзелә.

17 майда Урта Ныртыда яшәүче И. үз авылы эчендә спиртлы эчемлек кулланган килеш транспорт белән идарә иткәндә тоткарлана.

20 майда Сабаның Мәктәп урамында туктатылган Яр Чаллы кешесе М.ның да салмыш икәнлеге ачыклана.

21 майда район үзәгендә яшәүче Д.да З.Йосыпов урамында исерек хәлдә автомобиль йөртә. Шул ук көн­не Шәмәрдәннең Лермонтов урамында ма­шинасы белән хәрәкәт иткән Ә.гә дә беркетмә төзелә.

Бу йөртүчеләрнең барысына да административ эш кузгатылды. Суд чы­гарган карар нигезендә алар 30 мең сум штраф түләргә тиеш булачак­лар. Автомат рәвештә "права"дан мәх­рүм итү чарасы да өстәлә. Агымдагы елның 5 аенда барысы 40 йөр­түче шундый җәза алды. Шулай ук юл хәрәкәте кагыйдәләрен тизлек арт­тырып бозучыларның да артуын искәртми булмый. Биш айда фотовидео чаралары шундый 2117 очракны теркәде. Ягъни 2016 елның шушы чо­ры күрсәткече белән чагыштырганда 336га күбрәк. "Лихачлардан" сак була күрегез.