Татарча китаплар укыйк

- Укучыларның белем дәрәҗәсе - нәтиҗәлелекнең төп күрсәткече. Милли мәгариф өчен әһәмиятле күрсәткеч - 9 сыйныфларда татар теленнән бердәм республика тесты. Әлеге нәтиҗәләр буенча безнең район алдынгылар рәтендә. Район буенча уртача билге - 4,48 (республикада - 3,79), 2015нче елда районда 4,32 иде (республика-3,56), - ди районның мәгариф идарәсе башлыгы Илфат Шакиров.

Белем сыйфатының тагын бер күр­сәткече - республика олимпиада­лары. Узган ел татар теле һәм әдә­биятыннан республикада 19 приз­лы урыныбыз булган булса, бу уку елында әлеге сан 23кә җиткән. При­зерларның күбесе (11) сәләтле балаларга белем бирү мәктәбеннән.

Кибәче урта мәктәбеннән - 3, Саба гимназиясеннән - 2, Шәмәрдән лицее, Эзмә, Югары Симет, Олы Шыңар, Явлаштау, Тимершык, Иштуган урта мәктәпләреннән берәр укучы республикада призлы урын алган. Шулардан 4 укучы җиңүгә үк ирешкән. Аларның өчесе - сәләтле балалар мәк­тәбеннән, берсе Эзмә авылыннан.

Сәләтле балаларга белем бирү мәктәбенең унберенче сыйныф укучысы, берничә ел рәттән олимпиадада җиңү яулаган Гөлнәзирә Газизова белән сөйләшәбез.

- Ике ел рәттән татар әдәбиятыннан Бөтенроссия олимпиадасының рес­публика этабында катнаштым. Беренче елны җиңүче, икенче елында призер исемен алдым. Татар китап­ларын бик яратып укыйм.

Дәрескә кирәкле китап­лардан тыш, татар телле газета-журналлар белән дә танышып барам. Татар телен саклап калыр өчен, яшьтәшләремә татарча китаплар күбрәк укырга, татарча фильмнар карарга тәкъдим итәм. Шул очракта телебез дә, рухыбыз да байый, - ди ул.

Казанда татар теле һәм әдәбияты буенча узган IV халыкара олимпиаданың йомгаклау этабында райо­ныбызның Иштуган, Ки­бәче, Завод-Нырты урта мәк­тәпләре һәм Шәмәрдән лицееннан ун укучы көч сынашты. Әлеге олимпиада буенча муниципалитетлар арасында безнең район II урында.