Дмитрий Медведев Хөкүмәтнең отставкага китү сәбәбен аңлатты

Элеккеге Премьер-министр Дмитрий Медведев Россия Хөкүмәтенең тулы составта отставкага китү сәбәпләрен аңлатты. Бу хакта ТАСС агентлыгы хәбәр итә.

Министрлар Кабинеты РФ Президенты Владимир Путин Федераль җыенга Юлламасында куйган киң колачлы бурычларны гамәлгә ашыруга комачаулык итмәс өчен отставкага киткән.

«Әлеге карарларны кабул иткәндә, алар хакында фикер алышу һәм ниндидер башка факторларга карамыйча нәтиҗә чыгару өчен Президент тулысынча азат булырга тиеш», - диде Медведев.

Юлламада куелган бурычларның берсе – сәяси системаны яңарту, «билгеле бер дәрәҗәдә хәтта илдә хакимиятләр балансын үзгәртү», дип искәртте элеккеге премьер. Аның сүзләренчә, бу суд системасына, парламентка, Хөкүмәткә һәм өлешчә Президентка да кагыла.

Фото: Илнар Төхбәтов

Чыганак: tatar-inform.tatar