Әлфия Авзалованың кызы Илһам Шакировка бәйле истәлекләре белән уртаклашты

Әлфия Авзалованың кызы Зөлфия Нигъмәтҗанова-Авзалова мәрхүм җырчы Илһам Шакиров хакында икенче әтиебез кебек булды диде. Ул җырчы турында истәлекләрен Ильяс Әүхәдиев исемендәге Казан музыка көллиятендә Илһам Шакировны искә алу кичәсендә сөйләде.

Зөлфия Нигъмәтҗанова-Авзалова сүзләренчә, Илһам Шакиров аның өчен икенче әтисе кебек булган. "Кызым дип эндәшә иде. Шакката идем: кешедә ике әти була аламыни инде?" - диде ул.

"Театр училищесына әнигә әйтмичә генә укырга керергә бардым. Әни гастрольләргә киткән иде. Имтиханнарга барганда, ишек янында Илһам абыйны очраттым. Ул миннән: "Эй, кая барасың?" - дип сорады. Мин: "Дус кызымның имтиханнары", - дип алдадым", - дип сөйләде Зөлфия Нигъмәтҗанова-Авзалова.

Әлфия Авзалова кызы сәхнәдә имтихан тапшырганда, Илһам Шакиров кабинетка керә. "Югалып калдым", - дип искә алды Зөлфия ханым. Ләкин ул чыгышын дәвам итә, һәм ахырда театр училищесына укырга керә. "Кызык та, кызганыч та иде әлеге очрашуыбыз", - дип әйтте ул.

Фото: Абдулл Фархан

https://tatar-inform.tatar