Татарстанда Ураза бәйрәме хөрмәтенә гаилә һәм балалар бәйрәмнәре узачак

Фото: dumrt.ru

Бүген Казанда һәм Татарстан шәһәрләрендә һәм районнарында Ураза бәйрәме хөрмәтенә гомумшәһәр балалар һәм гаилә бәйрәмнәре узачак. Мөхтәсибәтләр балалар һәм аларның ата-аналары өчен мавыктыргыч һәм файдалы программа әзерләде: тәм-томнар, викториналар, конкурслар, бүләкләр, актив уеннар, карусельләр, ярминкәләр... Бәйрәмнәр мәчет ишегалларында һәм башка җәмәгать урыннарында – паркларда, җәяүлеләр йөри торган урамнарда, спорт комплексларында узачак. Бу хакта ТР Диния нәзарәте матбугат хезмәте хәбәр итә.

Казанда шәһәр халкын һәм башкала кунакларын түбәндәге локацияләрдә көтәләр:

- Иске Татар бистәсендә «Мәрҗани» мәчете янында «Рамазан фест» бәйрәме 13:00 сәгатьтә башлана.

- «Гаилә» мәчетендә балалар бәйрәме 10:00 сәгатьтә башлана.

- «Әхмәдзәки» мәчетендә гаилә бәйрәме 13:00 сәгатьтә башлана.

Татарстан районнарында да бәйрәмнәр узачак:

- Алабуганың «Чебурашка» паркында 13:00 сәгатьтә: интерактив күңел ачу программасыннан тыш, кунакларны бәйрәм пылавы һәм татлы мамык белән сыйлаячаклар.

- Чаллыда «Тәүбә» мәчете һәм Г.Тукай исемендәге яр буенда 11:00 сәгатьтән ярминкәләр эшли башлый, 14:00 сәгатьтән бәйрәм рәсми рәвештә ачыла.

- Сарманда Җәмигъ мәчете янында 14:00 сәгатьтә 12 яше тулмаган балаларны көтәләр, аларга бүләкләр, мастер-класслар һәм бәйрәм чәе әзерләнә.

- Баулыда бәйрәм «Гали» мәчете янында 9:00 сәгатьтә башлана.

- Теләчедә Үзәк ял паркында 13:30 сәгатьтә башланып китә.

- Лаешта «Ихлас» мәчете янында - 10:00 сәгатьтә, «Мәдинә» мәчете янында 10:00 сәгатьтә, Пәләү авылы мәчете янында 10:00 сәгатьтә. Сокурыда «Ихсан» мәчете янында бәйрәм 21 мартта узачак.

- Менделеевскида Җәмигъ мәчете янында 13:00 сәгатьтә, бәйрәмнән тыш, биредә таравих намазына күбрәк йөргән балалар арасында «Рамазанны намазда үткәрү» акциясенә йомгак ясалачак.

- Лениногорскида «Юбилейный» паркында 13:30 сәгатьтә башлана.

- Мөслим спорт комплексында 13:30 да ир балалар арасында Рамазан Кубогына мини-футбол узачак; биредә үк 9:00 сәгатьтә 6 яшьтән зуррак ир балалар һәм ир-атлар, 6 яше тулмаган ир балалар һәм хатын-кызлар арасында ярышлар узачак.

Тулырак: https://tatar-inform.tatar/news/tatarstanda-uraza-bairame-xormatena-gaila-ham-balalar-bairamnare-uzacak-5920875