Тоткарланучы гаебен таныды

   Кичтән эчелгән хәмернең ир­тәгәсен эзе дә  калмый дип  уйлаучылар нык   ялгыша. Алкогольнең организмнан тиз генә  чыгып бет­мәве күпләрне  уңайсыз  хәлдә  калдыра. Бит кенә  кызарып  калмый, ул  кесәгә дә нык  суга. Агымдагы елның 4 апрелендә Лесхоз бистәсенең Тепличный  ура­мында фронталь үзтөягечтә бару­чы, мә­сәлән,  иртәнге 8 сәгать 20 минутта ук туктатыла. Аның  бе­лән  А.М.Бәдретдинов  идарә итә. При­борга өрү тоткарланучыда 0,704 промилле алкоголь микъдарын күрсәтә.  Йөртүче бер­кет­мәгә моны раслап имзасын куя. Җәмәгать судьясы үзенең гаебен таныган Бәдретдиновка карата 45 мең сум күләмендә штраф түләтү һәм  ел ярымга машина йөртү хокукыннан мәхрүм итү турында  карар  чыгарды. Штрафны вакытында түләмәгәндә административ җаваплылыкка тартылачагы  аңлатылды. Карар  үз  көченә керде.

Материал район юл хәрәкәте иминлеге комиссиясе

булышлыгында әзерләнде.