Депутат космонавт түгел, ул халык арасында

Агымдагы атна башыннан республикада  парламент дәресләре ункөнлеге башланып китте. Укучылар  өчен  «Ватанга хезмәт итү – изге бурыч!»  дип исемләгән мөһим чара  Татарстанда, Россия Федерациясендә  Ватанны саклаучылар елына, Бөек Ватан сугышында Җиңүнең 80 еллыгына багышлана. Дәресләрдә гадәттәгечә Дәүләт Советы, Дәүләт Думасы, шәһәр һәм район советы депутатлары катнаша.

Өченчекөн Саба  урта мәктәбендә “Парламент дәресләре” Дәүләт  Советы депутатлары  Нияз Аитов,  Дамир Шакиров,  район  Советы депутатлары Расих Закирҗанов,  Расих Хәсәнов  катнашында   узды.  Аларны VIII һәм X сыйныф  укучылары кызыксынып тыңлады. Һәрхәлдә депутатлар аларга битараф булырга  ирек бирмәделәр, дәресне үзара әңгәмә кору шәкелендә  үткәрделәр. Саба шәһәр җирлеге башлыгы Расих Хәсәнов  бистәнең 10 округына  сайланган  депутатлар эшчәнлеге, сайлау тәртибе, утырышларда   карала торган мәсьәләләр белән  таныштырды. Район  үзәге зурая, төзекләнә, моннан  22 ел элек 6800  кеше  яшәсә, хәзер  9500дән арткан. Депутатлар  халык  мәнфәгатьләрен  кайгырта, сораулары булган гражданнар атнаның  һәр  сишәмбесендә җирлек башлыгына ишекне  киң  ачып керә алалар. Бөтендөнья  татар  конгрессы  Милли шура рәисенең беренче урынбасары  Данис Шакиров та шәһәргә әйләнеп барган Сабада  яшәүне зур бәхет итеп санавын  белдерде. “Шулаймы,  килешәсезме минем белән?” дип соравына  укучылар   алкышлау белән  җавап бирделәр.

“Сезнең белән аралаша башлаганнан  соң, тагын  шундый  сорау бирәсем  килә. Кем үзен  киләчәктә дәүләт эшендә  күрә.  Кулларыгызны  күтәрегез әле? Барыгызда гражданнар инициативасы  сезнең  кулларда икәнлеген  аңларлык  яшькә җиткәнсез. Парламент  дәресләре дә  формаль  чара гына булып  калмасын, киләчәгезне билгеләүче  чарага әверелсен  иде”– дип   мөрәҗәгать итте   ул  укучыларга.

Чараны җанлы диалог  шәкелендә үткәрергә омтылган Нияз Аитов исә  актив укучыларга  кызыклы бүләк тә  әзерләнүен белдерде. Дәрестә  катнашучыларга  депутатка космонавтка итеп  карарга  кирәк түгеллеген, ә җирдә, халык арасында   йөрүче, аларның  наказларын үтәүче  кеше  икәнлеген   аңлатты. Бүләкләр, әлбәттә, яңа хуҗаларын тапты.  Гомумән, укучылар парламент дәресләрендә үзләре өчен  күп  файдалы  мәгълүмат  алдылар.