Имин йөртергә язсын

Фәнил Мәүлетов, 25 октябрь 2019 - 08:57

925

Безнең көндәлек тормышыбыз хәзер транспорт белән нык бәйле. Машина йөртүчеләр үзләре дә дәрәҗәле халык. Бәяләрен беләләр. Әнә ерак юлларга йөрүчеләр үзләренең хокукларын яклый башлагач, аларны робот техникасы алыштыра алачагы турында да сүз чыгардылар. Әмма моның якын киләчәктә дә мөмкин түгеллеге ачыкланды.

Мин үзем, мәсәлән, шоферы булмаган машинага, компьютерга ышанып, гомер утырмаячакмын. Ә менә җаваплылыгы чикләнгән “Яшен” җәмгыяте автобус йөртүчеләре рульдә булса, күңелең тыныч. Барасы җиреңә үзеңнен имин барачагыңны хис итеп юлга кузгаласың. Оешмада 123 транспорт берәмлеге исәпләнеп, йөртүчеләре 70кә якын. Механик Расих Хәлилов әйтүенчә, эш һәм ял сәгатьләрен контрольдә тоту өчен барлык төр транспорт тахографлар белән җиһазландырылган һәм ГЛОНАС системасына тоташтырылган. Бу автобус йөртүчеләрне контрольдә тоту өчен генә түгел, пассажирлар иминлеген тәэмин итү өчен кирәк. Беренче чиратта сүз көн саен 23 мәктәп автобусына утырып юлга чыккан укучылар турында бара. Автобусларны йөртүчеләр Равил Гарипов, Рөстәм Фәһмиев, Николай Антонов, Гаяз Хөсәенов, Рамил Закиров, Марат Фәрләхов, Айдар Хәмидуллин, Рафис Тимербаев, Рамил Ногманов, Ильяс Ибраһимов, Рамазан Галимуллин, Рамил Шакирҗанов һәм башкалар турында бухгалтериядә мактау сүзләре генә ишеттек...

Рамазан Зарипов, җаваплылыгы чикләнгән “Яшен”, “Рамазан” һәм “Таш” җәмгыятьләре директоры: Оешмаларыбызның һәр яктан үсүенә, безнең хезмәтләрдән файдаланучыларның ихтирамын казануга үзләреннән лаеклы өлеш керткән хезмәт ветераннарыбызны, бүген руль артында булган, башка җаваплы эшләр башкарган хезмәткәрләремне, бөтен район автомобиль йөртүчеләрен чын күңелдән һөнәри бәйрәмебез белән котлыйм. Йөкләнгән бурычларны үтәүгә җаваплылык хисе белән караулары өчен ихлас рәхмәтемне белдерәм. Барысына да сәламәтлек, хәвеф-хәтәрсез юллар, исән-имин тормыш, гаилә бәхете телим.