Күп сынаулар күргән Зәкиябану әби
Бу көннәрдә Эзмә авылында яшәүче Зәкиябану Фазлый кызы Фазлыева 95 яшьлек олы юбилее уңаеннан Россия Федерациясе Президенты Владимир Путинның Котлау хатын кабул итеп алды. Мөхтәрәм юбилярны «Игенче» җәмгыяте җитәкчесе Алмаз Зарипов, социаль яклау бүлеге начальнигы Лилия Гайнетдинова, Эзмә авыл җирлеге башлыгы Райнур Әхмәтов тәбрикләде.
Зәкиябану Фазлыева Иләбәр авылында туган. Шекше авылында җидееллык мәктәпне тәмамлый. Әтисе оста тегүче була, әнисе, йөрәк авыруы сәбәпле, бик иртә дөньядан китә. Бер ваемсыз уйнап йөргән җирдән сугыш башланган дигән хәбәрне ишетүен бүген дә тетрәнеп искә ала Зәкиябану әби. Шушы көннән бөтен олылар эше балалар җилкәсенә кала. 1950 елда Эзмә авылыннан сугышта йөреп кайткан Нәкыйп исемле егет белән язылышып Казахстанга эшкә китәләр. Монда Наил һәм Рафаэль исемле малайлары туа, алар кыска гомерле булалар. Озакламый Свердловск өлкәсенең Түбән Тура шәһәренә күченеп китәләр. Анда Ринат, Әлфия, Гөлсинә дөньяга килә. Озакламый Эзмә авылына кайтып төпләнәләр. Биредә кызлары Гөлфия туа. Зәкиябану әби тумыштан авыру булган кызын да карап соңгы юлга озата. Алар Нәкыйп абый белән 55 ел гомер кичерәләр. Зәкиябану Фазлыева бүгенге көндә махсус программа нигезендә салынган бөтен уңайлылыклары булган йортта гомер кичерә.
Следите за самым важным и интересным в Telegram-каналеТатмедиа
Нет комментариев