Райондашларыбыз 90 яшьлек олы юбилейлары уңаеннан Владимир Путинның Котлавын кабул итеп алдылар

Мөдәрис Ибәтуллин  Юлбат авылында туган.  1947-1948 елларда Сабада  тракторчылар курсында укый.  

1950 елда  Ворошилов  колхозында тракторда эшли башлый.  1951-1954 елларда армия сафларында хезмәт итә.   1955 елда Мәртен авылы кызы Рәшидә апа белән гаилә корып, өч бала тәрбияләп үстерәләр. Машинист- сортировщик, аннан тегермәндә эшли. Бүгенге көндә Рәшидә ханым белән бер-берсенә терәк булып, 67 ел  матур гомер кичерәләр.   Алты оныклары, өч оныкчыклары бар. 

Хәкимә Мансурова   Мичәнбаш авылында туган. Сугыш башланганда 9 яшьлек булган кыз әлеге чорның бөтен авырлыгын үз җилкәсендә кичерә. «Иң үзәккә үткәне – ашарга, кияргә кием булмау. Сугыш вакытында мәктәпкә йөрмәдем,  үзлегемнән язарга, исәпләргә, санарга өйрәндем. Сугыш укырга мөмкинлек бирмәсә дә, рус телен дә ипи-тозлык булса да үзләштердем. Тормышка чыкмадым, әти-әниемне тәрбияләп соңгы юлга озаттым», - дип сөйли Хәкимә апа.  Гомер буе колхозда хезмәт куя, сыер сава, бозаулар карый,  амбарда эшли.   Ирләр белән беррәттән авыр эшләр башкара.  Бүгенге көндә  Мичәнбашта туганнары ярдәмендә  гомер кичерә.