Саба муниципаль районы Советында үсеш фаразлары билгеләнде

Утырышны Совет рәисе, район башлыгы Рәис Миннеханов алып барды. Башта  җирле үзидарә органнарында озак  еллар нәтиҗәле эшләүчеләр Мактау грамоталары, Рәхмәт хатлары белән бүләкләнде.

Аннары  башкарма  комитет җитәкчесе  урынбасары  Марат Баһманов  сессиядә катнашучыларны  Саба  муниципаль районының 2025-2027  елларга социаль-икъ­тисадый үсеше фаразлары белән таныштырды. Слайдлардан күренгәнчә, быел  районның тулай территориаль продукты күләме 26,1 миллиард, ә 2027 елга 32,3 миллиард  сумга җитәр дип  көтелә. Аграр  тармакта алдагы  өч  елда  үсеш   күрсәткечләренең 101,7-102 процент тәшкил итәчәге  фаразлана. Явлаштауда саву  залы белән 400 башка исәпләгән   сөт комплексы, Арташ бүлекчәсендә 360 башка  сыерлар торагы төзү  каралган. Сәнәгатьтә җитештерү   күләме 2027  елга 7,5 миллиард  сумга  җитәргә тиеш. Әлеге тармакта 2025-2026 елларда “Сабино”  җәмгыяте  теплицасының 1 гектарлы икенче чиратын кору,  мөгезле  эре терлек эшкәртү һәм  консервлау цехы, иттән ярымфабрикатлар җитештерү, прәннек,  кош-корт сую  заводлары төзү планлаштырыла. Быел районга   җәлеп  ителгән инвестицияләр күләменең 6,1 мил­лиард, 2027 елга 6,6 миллиард   сумга  җитүе фаразлана.  Депутатлар әлеге   көн тәртибе буенча карарны бертавыштан кабул иттеләр.

Шулай ук утырышта 2025 елга hәм 2026-2027 елларның планлаштырган чорына район бюджеты проекты беренче укылышта каралды. Доклад белән финанс-бюджет палатасы рәисе Шәмсун Сөнгатов чыгыш ясады.   Алдагы  көн тәр­типләре буенча сүз җир һәм  мөлкәти  мөнәсәбәтләр  палатасы рәисе  Алим Галиуллинга, башкарма  комитетның юридик бүлек начальнигы  Альберт Миникаевка бирелде. Саба  муниципаль районы  карамагында  булган милекне   арендага бирүне  килештерү тәртибен  раслау турында  карар кабул ителде.