Район яңалыклары

Саба урта мәктәбендә “Тату сыйныф серләре” бәйгесе узды [+фото]

Фәнил Мәүлетов, 28 октябрь 2022 - 13:00

1253

Агымдагы атнада Саба урта мәктәбендә ата-аналар катнашында беренче зур чара – “Тату сыйныф серләре” бәйгесе үткәрделәр.

❮ ❯

Саба урта мәктәбендә “Тату сыйныф серләре” бәйгесе узды [+фото]

Агымдагы атнада Саба урта мәктәбендә ата-аналар катнашында беренче зур чара – “Тату сыйныф серләре” бәйгесе үткәрделәр. Яшь буынны тәрбияләүдә мәктәп һәм гаилә бердәмлегенә юл әнә шулай салынды. Тәрбия эшләре буенча директор урынбасары Гөлчәчәк Хөснетдинова әйтүенчә, быел ачылган мәгариф учреждениесендә 286 укучы белем ала. “Алар Сабада яшәүче әти-әниләре гаризасы нигезендә кабул ителде. Контингент яңа мәктәптә укырга теләге булган балалардан тупланды. Максатчан коллектив булып оешып киләбез. Бүгенге чара да шуңа омтылыш мисалы”,– ди завуч.

Бәйгенең “Визит карточкасы” номинациясендә 8б, 1а, 5б, 8а, 6а, 2а сыйныфлары укучылары һәм әти-әниләр комитетлары катнашты. Ике сәгать дәвамында командалар бер-берсен сәхнәдә алыштырдылар, һәр чыгыш алкышланды. Бигрәк тә беренчеләрнең үз проектларын яклавы тамашачыларда симпатия тудырды (фото). Чикләнгән вакытта һәр командага иң дус, тату сыйныф булуын дәлилләргә кирәк иде. Монда инде ата-аналар бөтен булган фантазияне, осталыкны эшкә “җиккәннәр”, видеоматериаллар әзерләгәндә квадрокоптерлардан да файдаланганнар. Шәп кадрлар килеп чыккан. Биремнәрне дә барысы уңышлы үтәделәр. Жюрига “Визит карточкалары”н темага туры килүе, актуальлеге, яңалык кертелгән булуы, атрибутикасы, башкару техникасының оригинальлеге, командаларның презентациясе, нәфис сүз осталыгы буенча бәяләгәндә бер дә җиңел булмады. Әмма бәйге шуңа да бәйге инде ул: җиңүче ачыкланырга тиеш. Урыннарны билгеләгәндә тамашачы алкышлары да үзенекен итте. Шулай итеп, 25 ноябрьдә район зона этабында 1а сыйныфының ата-аналар комитеты катнашачагы билгеле булды. “Безнең чыгышка, дәрестә дә тик утырмый торган 18 малайны тыңлата алуыбызга күпләр хәйран калган. Башта 1нче сыйныфлар зонага үтмәячәк дигән сүзләр ишеткәч үртәлгән идек. Хәзер зона бәйгесе көтә. Анда сынатмас өчен чыгышыбызны бераз баетырга уйлыйбыз”,– дип кичерешен уртаклашты Раянның әнисе Райлә Галәвина. Социаль челтәрләрдә дә әниләр җиңү турында “Шомарту өстендә каты эшлисе була”, “Балаларыбызга сокланырга да куркып карап тордык”, “Авыртмыйча, әтиләребез яныбызда булып, матур итеп башкарып чыгарга язсын” дип язганнар.

Икенче этапта сәхнәгә кызлары Энҗе, Сәйдә белән Галиәкбәровлар, Гыймадиевлар, уллары Камилне алып Вәлиәхмәтовлар гаиләләре чыкты. Барысы да номинациягә туры килерлек иҗади гаилә, җырга-моңга гашыйклар, нәфис сүз осталары. Жюри балларны исәпләнгәннән соң, зонада катнашу хокукы Гыймадиевлар һәм Вәлиәхмәтовлар гаиләләренә бирелде.

Следите за самым важным и интересным в Telegram-каналеТатмедиа

Без социаль челтәрләрдә: Телеграм, ВКонтакте, ТикТок, Ютуб, Одноклассники, Твиттер, Яндекс.Дзен