Саба таңнары

“Тормышта персидәтель була алмасам да, театрда уйнарга туры килде менә”

Районыбыз башлыгының якташыбыз Шәүкәт Биктимеров истәлегенә "Театр фестивале" уздыру турындагы карары күпләрнең күңелен кузгатты, сәхнәгә чыгарды.

Кыш айларында район театрлы тормыш белән яшәде. Мәдәният хезмәткәрләре олысын-кечесен "артист" итте. Мәсәлән, безнең Йосыф-Алан, Калатау авыллары үзешчәннәре көче белән Йосыф-Алан клубында Данил Салиховның "Коткарыгыз, каравыл!" комедиясе куелды. Бәйрәм көн булгангамы, әллә халык театрга сусагангамы - залда бер буш урын да юк иде. Клуб мөдире Гөлнара Маликова 9 үзешчән катнашындагы спектакльне сәхнәләштереп, тамашачы хөкеменә чыгару өчен күп тырышлык куйган. Төп рольне (колхоз рәисе) Илһам Нуретдинов башкарды. "Тормышта персидәтель була алмасам да, театрда уйнарга туры килде менә",- диде ул икенче көнне елмаеп. Клубта концерт-спектакльләр була калса, Илһамнан башка узмый. Илле өч яшьтә булса да, һич иренми ул. Яңа елда Кыш бабай булып киенә, концертларда сәнгатьле итеп шигырь сөйли, театр куйсалар , төп рольне аңа бирәләр. Шулай ук Фидаил Кәшиповның да бер генә спектакльдә катнашмый калганы юк. Бу юлы ул Кави ролен зур осталык белән башкарды.

Ә клуб мөдире Гөлнара Маликова үзе авыл хатыны Минҗиһан образына керде . Ул сәхнәдә, кирәк икән, ак әбигә дә, яшь кызга да "әйләнә". Хәер башка рольләрне башкаручылар да артистлардан ким уйнамадылар. Исемнәре белән күрсәтмәгәнгә үпкәләмәсләр дип уйлыйм.

Бер өйрәнгән спектакльне күрше-тирә авылларга да барып күрсәтү - элек-электән килә. Бу традиция хәзер дә яши. "Коткарыгыз, каравыл!" комедиясен үзешчәннәребез Туктар һәм Тенеки тамашачыларына да тәкъдим иттеләр. Шәт, аларга да ошагандыр артистларыбыз чыгышы.

Данил Галләмов.

Нравится
Поделиться:
Реклама
Комментарии (0)
Осталось символов: