Футболда уйнаучыларга - кәҗә бәтие

Терлекчелектә эшләүче хатын-кызлар максатчан һәм җитез икән­лек­ләрен футбол уеннарында да күрсәтте. Терлекче ханымнар 15 командага тупланып футбол уйнады. "Моның кадәр актив уенчылар күргән юк иде әле. Авыл хуҗалыгында эшләүчеләрдән дә футболчылар командасы оештырырга кирәк", - дип бәяләде спорт комментаторы, спорт мәктәбе директоры Рифат Хисамов. Әллә һава торышының кызулыгы да кыздырды, җиңүгә омтылыш көчле булдымы, чын күңелдән, азартланып уйнады футболчы хатын-кызлар. Нәтиҗәдә, 1 урынга "Юлбат" командасы кызлары чыкты һәм алар "Лукоз-Саба"ның кәҗә бәтиләре белән бүләкләнде. Икенче урынны алган авыл хуҗалыгы идарәсе кызлары күркәләр, 3 урынны яулаган "Лукоз Саба" кызлары тавык­лар белән бүләкләнде.