Америкада 67 ел бергә яшәгән пар бер үк көндә дөньядан киткән

Калифорния штатында 67 ел бергә яшәгән ир белән хатын бер үк көндә дөньядан киткән. Флойд һәм Вайлет Хартвиглар 11нче февраль көнне үзләренең өйләрендә кулга-кул тотышкан килеш якты дөньядан китәләр. Аларның берсенә 90, ә икенчесенә 89 яшь тулган була.

"Алар бергә китәргә теләделәр. Бу шулай булырга тиеш иде инде",- дигән кызлары.

Флойд һәм Вайлет 1947 елның 16нчы августында танышалар. Өйләнешкәннән соң өч бала алып кайталар. Алар бәләкәй фермада күркә үрчетеп һәм мамык үстереп сатып көн күрә торган булганнар.