Галимова «Татарстан Герое» исеме турында: Бу инициатива берни белән дә беркетелмәгән

«Татарстан Герое» дигән яңа дәүләт бүләген гамәлгә кую мөмкинлеген һәм перспективаларын бәяләү бары тик әлеге инициативаның тиешле норматив базасы әзерләнгәч кенә мөмкин булачак. ТР Президентының матбугат хезмәте җитәкчесе Лилия Галимова журналистлар катнашындагы брифингта шулай дип белдерде.

Ул билгеләп үткәнчә, хәзерге вакытта инициатива әле башлангыч этапта гына, тәкъдим үзе әлегә норматив база белән беркетелмәгән.

«Яңа исемнең нинди рәвештә, нинди казанышлар өчен биреләчәге турында документлар пакеты әзерләнергә тиеш. Әлеге очракта бу нәкъ менә закон чыгаручыларның хокукы», - диде Галимова.

ТР Дәүләт Советы вице-спикеры Марат Әхмәтов элегрәк республиканың яңа дәүләт бүләген гамәлгә кую инициативасы белән чыккан иде. 

Фото: «Татар-информ» архивы

Чыганак: tatar-inform.tatar