Курай кемнеке?
Роспатентның сәнәгать милке федераль институты курайның Башкортстанда барлыкка килүе турында документ чыгаргач, музыка бегечләре әнә шулай дип белдерде. Курай – төрки халыкларның уртак уен коралы, ди алар. Башкортстанда исә бу уен коралының барлыкка килү урынын теркәү эшләренә 2014 елда ук старт бирелгән.
Башкорт бренды буларак теркәү эшен Башкортстанның Курайчылар берлеге җитәкчесе Азат Аитколов башлап җибәргән. Ут күршеләр курайга дәүләт дәрәҗәсендә игътибар бирә. Мәктәпләрдә курайда уйнарга өйрәтү түгәрәкләре эшли, әледән-әле курайчылар бәйгеләре оештырыла.
– Күрше республика бу мәсьәләдә елдам булып чыкты. Шул арада патент алдылар. Хәзер курай дип әйттермиләр дә, башкорт курае дип әйттерәләр. Ә бит курайда татар уен алымы бар. Минзәлә якларында ул әле дә сакланган. Аннары Ирфат Хисамовның гади курае чыкты. Чаңгы таягыннан эшләнгән курайга калдык, көпшә курайны тергезү турында уйлап та карамадык. Шул ук вакытта Башкортстанда музыка уку йортларында, хәтта сәнгать институтында да курай классы ачтылар. Менә ничек күтәрделәр! – ди Татарстанның атказанган сәнгать эшлеклесе Харис Нигъмәтҗанов.
Татарстан Республикасы фольклор музыкасы дәүләт ансамбле җитәкчесе Айдар Фәйзрахманов та “башкорт курае” дигән төшенчә белән килешмәвен белдерде:
– Безнең урманнарда үскән кура хәзер башкортныкы булганмыни? Нишләп Арча урманында үскән курадан ясалган курай башкортныкы булырга тиеш? “Русская береза” кебек килеп чыккан бу. Алайса нишләп ярты Башкортстан, татар тальянында уйнап, халыкара бәйгеләрдә җиңүләр яулый соң? Алай булгач, хәзер Урал таулары да башкортныкы гынамыни? Бу бит – әкият. Сәхнәдә мин башкорт курае димим, көпшә курай дим. Кура бит ул үсемлек, теләсә кайда үсә ала. Мондай брендлар ике халык арасын бозу өчен уйлап чыгарыла.
Следите за самым важным и интересным в Telegram-каналеТатмедиа
Нет комментариев