Рөстәм Миңнехановның Instagram-аккаунтындагы бөтен контент - авторныкы

ТР Президенты Рөстәм Миңнехановның Instagram-аккаунтына язылучылар шәхси сәхифәдәге бөтен контентның да авторныкы булуына инана ала.

Мисал өчен, кичә ТР Президенты «Штаб» креатив индустрияләр резиденциясендә «Балалар җыр марафоны»нда булды. Әлеге визиты вакытында ул үз аккаунтында татар җырчысы Салават Фәтхетдиновның чыгышы яздырылган видео урнаштырды. «Аппаратная» Telegram-каналы исә Рөстәм Миңнеханов җырчының чыгышын телефонга төшергән мизгел сурәтләнгән фото тәкъдим итте.

«Кызыклы моментлар күрсәм, аларны үземнең сәхифәдә урнаштырам», - диде ТР Президенты.

Сүз уңаеннан, Татарстан Президенты әлеге концертта социаль челтәрдә үз сәхифәсенә язылучылар санын ярты миллионнан ике миллионга кадәр арттыра алуын, әмма беркайчан да мондый максат куймавын искәртте.

Фото: «Аппаратная» Telegram-каналы

Чыганак: tatar-inform.tatar