Сак булыгыз: социаль мошенниклык очраклары артты

Татарстан Республикасы буенча төрле социаль мошенниклык очракларының артуы сәбәпле, 2014 елның 23 октябреннән 3 ноябрьгә кадәр Татарстан Республикасы буенча Эчке эшләр министрлыгы тарафыннан "Сак булыгыз, мошенниклар!" акциясе үткәрелә. Акция кысаларында әлеге төр җинаятьнең схемаларын аңлату максатында халык белән очрашулар үткәрелә. Иң элек төрле алдакчылар тозагына капмау, финанс һәм матди зыян килүдән саклану өчен кешеләрнең үзләренә уяулык күрсәтү сорала. Мондый җинаятьләр безнең районда юк, болар миңа кагылмый дип игътибарыгызны киметмәгез, чөнки заман технологияләренә нигезләнгән алдакчылык, җиңел баерга тырышу ысуллары чикләрне белми. Әгәр телефоннарга төрле шик­ле смс-хәбәрләр килсә, үзен социаль хезмәткәрләр дип тәкъдим иткән шик­ле кешеләр күренсә яисә башка шундый очракларда Россия Эчке эшләр министрлыгының Саба бүлегенә хәбәр итәргә (тел: 2-32-02) кирәк.