Яшьләр нигә кырыла?
Пенсия яшен арттырып куйгач, күпләр, бу яшькә җитәсебез юк икән дип уфтанып куйды. Ялга чыгып, оныклар сөяргә вакыт калырмы, янәсе? Депутат Александр Владимиров та, ир-атлар 65 яшьтә ялга китәргә тиеш, дигән фикерне күтәреп чыккан иде. Кызганыч, үзе дә бу яшькә җитәсенә төгәл ышанса да, 53 яшендә бакыйлыкка күчте. Җырчы Юлия Началованың – 38 яшендә, “Эфир” телеканалында алып баручы Алексей Кулешовның кичә 39 яшендә дөньялыктан китүе бөтенләй күңелне төшерә. Икесе дә табиблар янәшәсендә, хастаханәдә була. Җырчының сәламәтлеге начар булган. Алексей үпкәсе ялкынсынудан үлгән, диләр.
Алексей Кулешов Самара шәһәрендә туган. Казан дәүләт университетының филология факультетын тәмамлаган. Башта ул – Яшел Үзән телевидениесендә, аннары “СТС” – Казань” каналында яңалыклар хезмәтендә, Татарстанның Экология министрлыгында “Альтернатива” телестудиясендә эшли. “Эфир” телеканалында – 2003 елдан бирле. Башта Алексей Кулешов яңалыклар хезмәтендә хәбәрче була, аннары “Город” һәм “Тема” тапшыруларын алып бара.
Яшьләрнең шулай иртә китүенә йөрәк әрни. Нәрсәгә бәйле соң бу? Сәламәтлегебезгә битараф булумы? Авыргач та, үзебезгә вакыт тапмыйча, дөнья малы артыннан куумы? Башта мең төрле уй. Үзем дә шул яшьтә. Бер карасаң, тормышның иң матур мәле. Тормыш тәртиптә, балалар үсүенә шатланып яшибез. Алда эшләнәсе эшләр дә байтак. Тик үлем алдында без барыбыз да көчсез. Пенсиягә чыгу турында хыялланган булабыз тагын. Безнең әбиләрдән дә бәхетле кеше булмаган икән ул. Җир җимертеп эшләгән, аяк астындагы үлән белән дәваланган да 90га җиткән. Бер-ике бала белән генә калмаган, иң аз дигәндә, бер гаиләдә 5-6 бала булган. Пенсия яшен дә күргән алар. 50 яшьтән ялга чыгып, 40 ел пенсия алып, балаларына, оныкларына булыша алганнар. Түрәләрнең пенсия яшен арттыруларына да гаҗәпләнәсе юк. Кайберәүләр 70 яшендә дә әби дигәнне яратмый, әле дә актив тормыш белән яши. Ә безнең буын? Алар озак яши алмый. Медицина алга киткән XXI гасырда халык кырыла. Бу юлларны язганда, авылыбыз мулласының сүзләре искә төшә. “Әҗәл вакыты бер минут соң да булмас, алдан да килмәс”, – дия торган иде ул.
Следите за самым важным и интересным в Telegram-каналеТатмедиа
Нет комментариев