Егетләрне көрәш чыныктыра

Безнең районда да су асты көймәләрендә хезмәт итә алырдай егетләр үсә. Алар хәрби хезмәттә үз бурычларын намус белән үтиләр. Ә 18-21 яшендә тирән океаннар айкаган ветераннар “подводник” исемен горур йөртә, яшь буында ватанпәрвәрлек тәрбияләү эшенә дә зур өлеш кертәләр. Үсеп килүче егетләрне бил алышу, көрәш чыныктырган яхшы аңлап, балалар-үсмерләр арасында ярышларга кадәр оештыралар. Быел Саба спорт комплексында 2005 елда туган һәм яшьрәк үсмерләр җыелды.

Ярышка Кукмара, Теләче районнарыннан, ә Рамил Антонов белән Тимур Ишмөхәмәтов Лаештан ук килгәннәр иде. Бәйгедә катнашучыларны район башлыгы урынбасары Расих Закирҗанов тәбрикләде. Озак еллар район хәрби комиссары булып эшләгән Альфред Габдерахманов та үсмерләрне батыр булып үсәргә, һәрвакыт җиңүләргә омтылырга чакырды.

“Илебез спортчылары дөнья ярышларыннан читләштерелгән чорда нык ихтыяр көченә ия булу аеруча кирәк. Көрәштә оттырудан кәефне төшерергә ярамый. Уңыш сезгә барыбер елмаячак”,– диде ул.

Сабада яшәүче Фәрит Шәйдулловка “Татарстан Республикасы диңгез җыены” төбәк иҗтимагый оешмасының Рәхмәт хатын тапшырды. Диңгезче ветеран Фәрит Касыйм улы 1972-1975 елларда Төньяк флотта атом су асты көймәсендә хезмәт иткән. Атлантик океанның нейтраль суларында өч ай автоном йөзүдә булган. Хәрби бурычын намус белән үтәгән.

“Бер дә үкенмим. Егетләргә дә, флотка чакырсалар, икеләнми барырга тәкъдим итәм. Гомерлек горурлык ул диңгезче булу”,– ди Фәрит Шәйдуллов.

Келәмгә иң элек балалар бакчасына йөрүчеләр чыкты. Ярышларның комментаторы танылган якташыбыз Илшат Вакказов булды. Призерлар 11 үлчәү категориясендә ачыкланды. Сабадан Тимерхан Әхмәтов, Ильяс Габдерахманов, Ислам Ибәтуллин, Нияз Хәлиуллин, Артем Варламов, Кукмарадан Данияр Гәрәев, Гаяз Степанов, Мәүлет Ибәтуллин, Ильяс Степанов, Аяз Газизов үз авырлыкларында батыр калдылар. Теләче командасы өчен көрәшкән Лаеш егете Рамил Антонов та дустының “Барысын да җиңә ул” дигән сүзләрен раслап 1 нче урынны алды.

“Ярышлар матур гына узып китте. Спонсорларыбыз “Трейд-металл” компаниясе һәм “Җиңел пар” кибете хуҗаларына, ветеран диңгезчеләргә зур рәхмәт. Киләсе елда ярышларның үткәрелә башлаганына 5 ел була. Үзенә күрә юбилей буларак оештырырга уйлыйбыз”,– диде флотта хезмәт иткән диңгез җыены активисты Фидаил Вакказов.