Хезмәттә узган гомер
Бу көннәрдә Сатыш авылында яшәүче Габдуллаян Зиннур улы Зиннуров, Мишәбаш авылыннан Сания Тимергали кызы Нәҗмиева үзләренең 90 яшьлек гомер бәйрәмнәре уңаеннан Россия Президенты Владимир Путинның Котлау хатын кабул итеп алдылар.
Габдуллаян абыйның хезмәт биографиясе 1942 елда башланып китә, ул мәктәптә 3 класс белем алганнан соң колхозда төрле эшләрдә хезмәт куя башлый. 1954-1958 елларда Саба юл төзү оешмасында эшли. Сабада йомры ташлар түшәп, юллар, тротуарлар салалар, күперләр эшлиләр. 1958 елда кабат колхозга кайтып, хуҗалыкта маллар карый башлый, балта остасы да булып эшли. Салам эскертлиләр, мал тораклары эшлиләр. Бер эштә дә сынатмый ул. Күп гаиләләрне сөендереп йортлар төзүдә катнаша, колхозның һәр төзелешенә үзенең өлешен кертә. 1990 елда лаеклы ялга чыга. Габдуллаян абый хатыны Нәҗибә апа белән 4 балага гомер бүләк итәләр, бүгенге кондә 10 оныгы, 12 оныкчыгына көр күңелле, җор телле дәү әти, дәү бабай булып имин картлык кичерә.
Тыл һәм хезмәт ветераны Сания Нәҗмиева Явлаштау авылында туып үсә. Хезмәт юлын бик яшьли сарыкчылык фермасында башлый, соңрак мөгезле эре терләр карый. Мишәбаш авылы егете Мәсгуть Нәҗми улы белән гаилә коралар. Калинин исемендәге колхозда төрле эшләрдә намуслы хезмәт куеп лаеклы ялга чыга.
Юбилярларны Сатыш, Явлаштау авыл җирлеге башлыклары Фаил Шәфигуллин, Ренат Нуриев тәбрикләп, изге теләкләр җиткерделәр.
Фото: pixabay.com
Следите за самым важным и интересным в Telegram-каналеТатмедиа
Нет комментариев