«Мәктәпкә җыенырга булыш»
Республикабызда әти-әниләргә ярдәм итү максатыннан үткәрелүче “Мәктәпкә җыенырга булыш!” хәйрия акциясе иң игелекле гамәлләрнең берсенә әверелде һәм елдан-ел киңрәк колач ала бара. Чыннан да, янәшәбездә ярдәмгә мохтаҗ гаиләләр шактый, аларны кайгыртуны да хөкүмәтебез мөмкин кадәр үз канаты астына алырга тырыша. Әле дөньяны яңа таный-белә башлаган сабыйларның берсенең дә мохтаҗлыкны тоймыйча, яшьтәшләре арасында кимсенмичә үсүләрен кайсыбыз гына теләми икән.
Бәйрәм барышында Саба муниципаль районы башлыгы Рәис Миңнеханов та: “Безнең иң олы байлык ул - сәламәт балалар, ягъни алар - безнең имин киләчәк дигән сүз. Балаларны бәхетле итеп үстерсәк, безгә бу алдагы көнебездә мең яхшылык булып кайтачак. Бөтен игътибарны балаларга юнәтергә, аларны тәрбияле, белемле итеп үстерүдә без- өлкәннәр бар мөмкинлекне дә эшкә җигәргә тиешбез. Хәйрия акциясендә катнашкан, үзләреннән өлеш керткән һәркемгә олы рәхмәтемне җиткерәм”-диде. Алга таба йөзләрендә шатлык чаткылары уйнап торган сабыйлар бер-бер артлы сәхнәгә чакырылып (иң башта беренче сыйныфка баручылар тәбрикләнде), район җитәкчесе һәркайсының иңнәренә мәктәп әсбаплары салынган сумкалар киертте, уку кирәк- яраклары җыелмалары бүләк итте. Алга таба сәхнәгә мәрхәмәтлелек ациясенә теләктәшлек күрсәткән җитәкчеләр күтәрелде. Балалар "Таттелеком" АҖ Саба бүлеге җитәкчесе Алмаз Галиев (фотода), “Игенче” җәмгыяте рәисе Алмаз Зарипов, “Саба” җәмгыятенең Сатыш бүлеге җитәкчесе Фәрхәт Сәүбанов, Лесхоз картлар һәм инвалидлар интернат-йорты директоры Рөстәм Равилин, “Мөхәммәтшин З.М. ”КФХ җитәкчесе Зөфәр Мөхәммәтшин, “Шытсу” авыл хуҗалыгы предприятиесе җитәкчесе Флорид Гайнуллин кулыннан да хәйрия ярдәмнәре алдылар. Бәйрәмне Балалар сәнгать мәктәбенең биючеләр ансамбле, виртуоз баянчы Айнур Габделхаков, танылган җырчы Илшат Сафин чыгышлары ямьләндерде. Сабада яшәүче 8 бала әнисе Фәридә Хәйретдинованың 3 баласы гимназиядә белем ала, быел 7 яшьлек уллары Илфир дә беренче сыйныфка укырга керергә җыена икән. Абый-апаларына бүләк алу шатлыгы белән уртаклашырга бәйрәмгә иң кечкенәләре - 2 айлык Иркә дә килгән иде. “Өч балабыз бүгенге көндә “Крутушка” санаториенда ял итә. Тормышка зарлана торган түгел, Аллага шөкер. Безнең кебекләрне дәүләт һәрдаим кайгыртып тора. Район җитәкчелеге ярдәме белән зур йортлы да булдык. Пособиеләр түләнә, менә мондый игелек акцияләреннән дә калдырмыйлар. Инде уку кирәк-яраклары хәстәрли башлаган идек, мәктәп формалары гына аласы калды. Оештыручыларга рәхмәттән башка сүз юк”,- дип канәгатьлелеген белдерде ул. “Без дә хөкүмәт күрсәткән ярдәмнән бик риза, карантин вакытында азык-төлек җыелмалары да китерделәр- дип, әңгәмәгә кушылды Тенеки авылында яшәүче 6 бала анасы Илдәрия Гомәрова. -Быел мәктәпкә 4нче балабызны озатабыз, 2 улыбыз белән бер кызыбыз Юлбатка барып укыйлар, авылдан автобус йөртеп тора. Моңа рәхмәт дими, ни дисең? Балаларыбыз мотаҗлыкны кичермиләр, тормыш өчен бар әйберебез дә бар, маллар асрап торабыз. Исән сау булыйк, шөкер итеп яшик!” ,- дип рәхмәт сүзләрен җиткерде шатлыгы йөзенә чыккан ана. Ул көнне Сабаның Яр буена килгән һәр бала, һәр ата-ана шундый күңелле хисләр, шатлыклы кичерешләр дулкынында тибрәлде.
“Быел районыбызда 1 сыйныфка 482 бала укырга керә. Узган ел бу сан 526ны тәшкил иткән”.
Автор фотолары
Следите за самым важным и интересным в Telegram-каналеТатмедиа
Нет комментариев