Сабада 2025 елның тәүге сабые аваз салды

  Саба үзәк хастаханәсенең тудыру бүлегендә быел районыбызның тәүге сабые туды. Бәхетле әти белән әни Шәмәрдәннән Луиза һәм Равил Вәлиевлар. Нәни Зәйнәп гаиләдә бишенче бала булып аваз салды. Вәлиевларның тагын 7, 6, 4, 2 яшьлек уллары Габдерахман, Ибраһим, Салих, Мөхәммәд үсеп килә. Әти кеше бу көннәрдә шатлыгын эченә яшерә алмый.

“Аллаһы Тәгаләгә чиксез дан һәм мактаулар булсын- безгә тагын бер кат әти-әни булу бәхетен насыйп итте. Район үзәк хастаханәсе табибаларына, тормыш иптәшемнең сәламәтлеген кайгыртып торган барлык шәфкать ияләренә зур рәхмәт. Раббыбыз Коръәндә балаларны дөнья тормышының бизәге дип атый, һәркемгә дә балалар үстереп, киләчәктә аларның игелекләрен, рәхәтләрен татырга насыйп булсын” дип уртаклашты  ул.

 Зәйнәпнең сау-сәламәт булып, әти-әнисе, абыйлары өчен зур куаныч китерүче игелекле бала булып үсүен телибез!