Шәмәрдәндә ябык манеж төзеләчәк

автор, 9 сентябрь 2020 - 11:15

861

Өченчекөн Шәмәрдән мәдәният йортында гражданнар җыены булды. Җирлек башлыгы Айдар Гәрәев соңгы 5 елда һәм агымдагы елның беренче яртысында башкарылган эшләр, 2020 елда хәл итәсе бурычлар белән таныштырды. Җыенда катнашучылар Шәмәрдән белән халык телендә “Шәмәрдән-2” дип йөртелгән яңа торак зонасы арасына тротуар салу, кәрәзле элемтәнең сыйфаты яхшырсынга шул урынга вышка кую, Һ.Такташ һәм Төзүчеләр урамнары арасын асфальтлау мәсьәләләрен күтәрделәр.

Район башлыгы Рәис Миңнеханов үзенең чыгышында Шәмәрдәндәге кадәр эшнең күрше төбәкләрдә районнар күләмендә дә башкарылмавын билгеләп үтте. “Моңа республиканың өстәмә табышы, гамәлгә кертелгән программаларның уңышлы эшләве нәтиҗәсендә ирешелә. Хәзер ябык манеж программасы керде. Инде республикада өчәү эшләнә. Без авыл районнары арасында чиратта 4нче булып торабыз. Инде, алла бирсә, киләсе елда Шәмәрдәндә ябык футбол манежы төзелер дип уйлыйбыз. Сездә яшьләр актив. Балалар туу саны гына кимеп китте. Мин аны вакытлы күренешкә саныйм. Демографик хәл яхшырырга тиеш”,– дип зур яңалык җиткерде район башлыгы һәм Шәмәрдәндә бассейн эшләүнең дә хыял гына булып калмаячагын белдерде.