"ИСӘНМЕСЕЗ"

"Исәнмесез" - шул гап-гади бер сүз,

Үзгәртә дә куя күңелне.

Я, Ходаем, каршысында аның

Укучысы тора түгелме?!

"Исәнмесез" - бары бер генә сүз,

Бөтен борчуларны тарата.

"Исәнмесез" - бу бит иң зур бәя,

Аның хезмәтенә карата.

Күпне өмет итми укытучы,

Хөрмәт кенә кирәк нибары.

Еллар узгач танып исәнләшсә,

Белем биргән кыз һәм уллары.

Иң бәхетле кеше шул чагында,

Гадел, сабыр, гүзәл укытучы!

Бу тылсымлы һәм гап-гади сүзне

Бүләк итсен сиңа һәр укучы!!!

Гөлнара Нургаязова.

Тимершык.