Татарча чәлпәк пешерү рецепты

Бу рецептта камырга йомырка күп салына, шуңа күрә ул бик нәфис һәм тәмле була.

Кирәкле әйберләр:

-Он — 1 кг

-Йомырка — 10 данә

- Сөт — 100 г

-Тоз — тәменчә

- Кыздырырга — 600 г үсемлек мае

Әзерләү ысулы:

1. Тирән савытка онны иләгез, уртасын чокып ясагыз.
2. Уртасына йомыркаларны сытыгыз, сөт һәм тоз өстәп, йомшак, ләкин кулга ябышмый торган камыр басыгыз.
3. Камырны 15-20 минут ял иттерегез.
4. Камырны кечкенә кисәкләргә бүлеп, җәегез. Чәлпәк бик юка булырга тиеш (1-2 мм).
5. Табада яки казанда майны кыздырыгыз.
6. Камырны кайнар майга салып, ике ягын да кызарганчы кыздырып алыгыз. Чәлпәк шунда ук кабара башлый, әмма бик тиз пешә, игътибарлы булыгыз.
7. Кыздырылган чәлпәкләрне кәгазь сөлгегә салып, артык маен сеңдерегез.
8. Әзер чәлпәкләрне өстәлгә куяр алдыннан шикәр пудрасы сибеп чыгарга мөмкин.

  Чәйләрегез тәмле булсын!