Татарстанда 36 градуска кадәр эссе булу сәбәпле, шторм кисәтүе игълан ителде

Татарстанда аномаль эссе һава торышы булу сәбәпле, куркыныч метеорологик күренеш турында шторм кисәтүе игълан ителде.

Татарстан Гидрометеорология һәм әйләнә-тирә мохитне күзәтү үзәге хәбәр иткәнчә, республика территориясендә уртача температура климат нормасыннан 9 һәм аннан да күбрәк градустан артып китә.

Метеорологлар фаразларынча, төбәктә аномаль эссе һава торышы 27 июньгә кадәр дәвам итәчәк. 23 июньнән 27 июньгә кадәр Татарстанда һава температурасы 31-36 градуска кадәр күтәреләчәк.

«Татар-информ» агентлыгы хәбәр иткәнчә, аномаль эсселек аркасында республикада 30 июньгә кадәр гадәттән тыш хәл режимын кертергә планлаштырылмый.

Фото: t.me/tatmediaofficial

Чыганак: tatar-inform.tatar