Сабаның кайбер кибетләрендә үлемгә чакыручы сагызлар булуы ачыкланган

Постмодерн технология бер урында гына тормый. Хәзер сатуда сагызның ашкайнату системасына гына түгел, кешенең психикасына тискәре тәэсир итә торганнары да пәйда булган. Әлеге продукция җәмәгатьчелектә ризасызлык дулкыны тудырды. Бу канәгатьсезлек ата-аналарның балаларын­да сәер биремнәр языл­ган төргәкле сагыз күрүләре белән бәйле. Соңгы вакытта сатуга килеп кергән сагызларда яшүсмерләрне куркыныч гамәл кылырга өндәгән язулар бар. Мәсәлән, кайбер сагыз тышларында иң югары җәмәгать урынына менеп селфи ясарга чакыралар. Ихтыяры формалашмаган бала моны эшләргә күп сорап тормый. Сагыздагы: "Дөреслек: үлем алдыннан нәрсә эшләргә өлгерергә кирәк?" Чел­тәрдә җавабың белән ур­таклаш" кебек язулар да борчылу тудыра.

Әлеге вәзгыятьнең кар­шы чаралар күрүне таләп итүе аңлашыла. Шушы көннәрдә хокук бозуларны профилактикалау буенча район ведомствоара комиссиянең киңәйтелгән утырышында да бу хакта сүз булды. Җәмәгать тәртибен саклау, җәмә­гать иминлеге һәм балигъ булмаганнар арасында хокук бозуларны профилактикалау буенча инспектор альбина исхакова чыгыш ясап әлеге мәсьә­лә­дә контрольлек итүче органнардан тиешле чаралар күрүне сорады. Әйтергә кирәк, сагызлар проблемасы район активы белән үткәрелгән утырышның да көн тәрти­бенә куел­ган иде. Район прокуро­ры зөфәр аби­тов чыгышыннан кү­рен­гәнчә, Рос­­сиядә ел саен 500ләп яшүсмернең үз-үзе­нә кул салу очрагы теркәлә. Проб­лема бала­ларны әлеге адымга этәрүче тышкы сәбәпләр фонында тагын да тәҗел. Үлем турында уйлануларга сагыздагы язуларга охшаш "зәңгәр кит" кебек интернет уеннар да сәбәпче. Полиция хезмәткәрләре үткәргән тикшерү барышында "Герат" кибетләрендә социаль челтәрләрдә нәкъ шундый уенга чакырган биремнәре булган сагыз булуы ачыкланган. "Сәү­дә­гәрләр сагыз сатып зур капитал туплый алмый. Әмма моның ахыргы нә­ти­җәләре кыйммәткә тө­шергә мөмкин. Сагыз са-­ту мәсьәләсендә кеше­не үз-үзенә кул салу хәленә җиткерү очраклары буенча җинаять эше кузгатырга хокук биргән 110нчы статья гамәлдә. Аны куллануга беркайчан да җирлек тумаска тиеш",- диде район прокуроры һәм киңәшмәдә катнашучы эшмәкәрләрне һәм сәүдә оешмалары җи­­тәкчеләре андый потенциаль куркынычлы про­­­дукция сатуларга юл куймаска чакырды. Прокуратура әлеге проблеманы аерым контрольгә алачак һәм башка хокук саклау органнары белән берлектә килеп туган вәзгыятькә мониторинг үткәреләчәк.

Фәнил Мәүлетов.