Яшь юл хәрәкәте инспекторлары тәртипкә чакыра
СССРда яшь юл хәрәкәте инспекторлары отрядлары (ЮИД) оештырылуга 50 ел тулды. Алар бүген дә үзенең әһәмиятен югалтмый, чөнки транспорт арткан шартларда юл хәрәкәте иминлеге аеруча җитди мәсьәләгә әйләнде.
1973 ел ахырына ил территориясендә 14 меңгә якын ЮИД отряды эшли башлый, төрле слетлар һәм ярышлар оештырыла, ә ике елдан соң «Орленок» лагерында Яшь хәрәкәт инспекторларының I Бөтенроссия слеты була. Республикабыз яшь инспекторлары үзләрен ил дәрәҗәсендә беренче тапкыр 1986 елда таныта.
“Юл хәрәкәте иминлеге” дәүләт учреждениесенең район бүлекчәсе җитәкчесе Гүзәл Ягәфәрова әйтүенчә, хәзерге вакытта район мәктәпләрендә 21 ЮИД отряды үз сафларына 321 укучыны берләштерә. Нигездә V-VIII сыйныф укучылары автоинспекторларның булышчылары булып языла. ЮИД хәрәкәте активистлары юлларда тәртип сакчылары ярдәмендә белем бирү оешмаларында балалар белән аңлату эшләре алып бара. Алар рейдларда катнашалар, яктылык кайтару элементлары тараталар һәм аларны юлда сизелерлек булыр өчен ничек дөрес кулланырга икәнен аңлаталар. 2020 елдан башлап ЮИД отрядлары педагог-җитәкчеләренең эшчәнлеге өстәмә рәвештә акчалата премия белән кызыксындырыла.
Яшь инспекторлар хәрәкәте оештырылган көнгә туры китереп, ЮХИДИнең район бүлекчәсе һәм “Юл хәрәкәте иминлеге” бүлекчәсе хезмәткәрләре Шекше төп мәктәбе ЮИД отряды белән очрашу үткәрделәр. Чарага “Акчарлак” балалар бакчасына йөрүчеләр дә җәлеп ителде. Алар инде тәрбияче апалары ярдәмендә юл хәрәкәте кагыйдәләрен өйрәнүдә башлангыч күнекмәләр алганнар. Шуңа күрә яшь инспекторлар үзләреннән сорау алганда бер дә төртелеп тормадылар, пазллардан юл билгеләре җыйдылар, табышмакларның җавапларын да тиз таптылар. “Отрядыбыз “Светофор” дип атала. Безнең белән шөгыльләрне укытучыбыз Илдар Фәнисович үткәрә. Юл хәрәкәте кагыйдәләрен, беренче ярдәм күрсәтү күнекмәләрен, велосипед белән төрле фигуралы каршылыклар аша йөрүне теләп һәм яратып өйрәнәбез. Барысы да тормышта кирәк булачак”,– ди VI сыйныф укучысы Камил Гыйбадуллин. Чыннан да, “Светофор” отряды «Имин тәгәрмәч» муниципаль бәйгеләрендә беренче унлыкта бара. Күрсәткечләрне тотрыклы яхшыртып, 2021 елда –2нче, былтыр 3нче урынны алдылар. Быел да исәпләре – призерлар булу. Шуны раслап, яшь инспекторлар ЮХИДИ хезмәткәрләре Илнур һәм Фаил абыйларына велосипедта фигуралы йөрү осталыгы күрсәттеләр, урамда автомобильләрне туктатып шофер белешмәлекләре өләштеләр
Следите за самым важным и интересным в Telegram-каналеТатмедиа
Нет комментариев