Рәсәйдә сараннар күбрәк кайда яши

Социологлар, Россияне айкап чыгып, иң саран һәм юмарт кешеләрнең кайда яшәгәнен ачыклаган. Мохтаҗларга ярдәм итәргә дип атлыгып торучыларның иң күбе - Урал белән Кавказда, ә менә бер тиен дә кызганучылар - Россиянең төньяк-көнбатышы белән Ерак Көнчыгышта. Без дә әллә ни юмартлык белән мактана алмыйбыз.

Россиядә яшәүчеләрнең 48 проценты соңгы ике елда сәдака биргәнен бел­дергән, ә менә узган ел андыйлар 70 процент булган. Тикше­рү­че­ләр сүзләренә караганда, хәй­риячелекнең күп тармагында юмартлык күренеше кимегән. Сәүдә йортлары, кибетләрдә торган тартмаларга салучылар 2014 елда 33 процент булса, хәзер - 24 процент, sms аша акча юллаучылар да азайган - 32 проценттан 18гә төшкән. Мох­таҗлар хисабына акча күчерүчеләр саны 4 процентны тәшкил итә.

Икътисадый кризиска бәй­ләп, соңгы вакытта хәй­рия йөзеннән керем белән уртаклашмыйбыз, дип әйтү­челәрнең иң күбе Себер федераль округы белән Ерак Көнчыгыш (55 процент) һәм Идел буе округында (61 процент) булып чыккан. Биредә сараннар күбрәк яши булып чыга. Мох­таҗ­ларга өлеш чыгармыйбыз, дип әйтүче­ләр­нең азрагы Үзәк (35 процент), Көнчыгыш, (30 процент), Урал (26 процент), Төньяк Кавказ (21 процент) округларында икән. Болары исә өстә әйтелгәннәрдән юмартрак булып чыга.

Сәдака бирүчеләр арасында хатын-кызлар күб­рәк. Сораштыруда катнашучы ир­ләрнең 49 проценты гомер­ләрендә бер тапкыр да мох­таҗларга ярдәм кулы сузмаган. Ә хатын-кызлар арасында андыйлар - 35 процент. Юмартлык ничә сум тора, дип сорау биргәндә, Рос­сиядә яшәүчеләрнең 36,4 проценты урамда хәер­не 50 сумнан да арттырмыйбыз, дигән.

("Ватаным Татарстан", /№ 113, 05.08.2015/)