“Балкыш” сортлы язгы бодай 66шар центнер уңыш биргән!

  Уракта эшне тизләтергә  явым-төшемнәр комачаулый. Шулай да, гомумән  алганда, һава  шартлары бөртекле-кузаклы  культуралар үсеше  өчен  уңай булды.  Аерым сортлар  мул уңыш белән  куандыра. Бу  уңайдан “Игенче” җәмгыятеннән дә яхшы хәбәр  килеп  иреште. Хуҗалыкта “Балкыш”  сортлы  язгы бодай  66шар центнер  уңыш биргән! Аны ПР-2 репродукциялесен Казан фәнни-тикшерү үзәгеннән (ФИЦ КазНЦ РАН) кайтарган булганнар һәм 40 гектарда үстергәннәр.

“Балкыш” орлыгы көрән күгәреккә, септориозга, ончыл чык авыруларына чыдам. Потенциаль мөмкинекләргә ия. Без  аны гектарына 2,5 центнер исәбеннән чәчтек һәм 120 килограмм ашлама керттек. Башта учарлану чорында чүп үләннәренә һәм  бөҗәкләргә  каршы эшкәртелде. Үсемлекнең флаг яфрагы чыккач, кабат фунгицид  сибелде. Барлык технологияләр  үтәлде,  яңгыры да булды. Нәтиҗәдә Эзмә  кырларында  моңарчы   күрелмәгән  уңыш алуга  ирештек”,– ди хуҗалыкның баш  агрономы  Нияз Галиев.

Башка  культуралар  да  сынатмаган.  Арпаның элита “Тевкеч” – 58, тритикаленың “Светлица” – 57,   көзге бодайның  “Универсиада”  сортлары 51әр центнер  уңыш биргән. Игеннәрдән  уртача гектар җыемы 42 центнәр тәшкил итә

Үткән  елларда “Игенче” җәм­гыяте кукуруз гибридлары үстерү мәйданчыгы булса,  хәзер язгы бодайның  элиталы  сортларын сынау  участогына әйләнәчәк.