Барьерларсыз хезмәт –клиентка якынаю

Биредә барысы да заманча һәм күңелгә хуш килерлек. Хезмәт күрсәтүчеләр барысы да бер залда эшли һәм аларны клиентлардан ниндидер пыяла барьерлар аерып тормый. Бу исә үзара ышаныч, күңелгә җылылык бирү, үзеңне уңай хис итү атмосферасы тудыра. Офистагы һәр деталь клиентны тәэсирләндерүгә, бирегә яңадан әйләнеп керәсе теләге тудыруга юнәлдерелгән. Үз-үзеңә хезмәт күрсәтү өчен банкомат, мәгълүмати-түләү терминалы куелган аерым зона булдырылган. “Без банкның даими клиентлары инде. Хезмәтләреннән еш файдаланабыз. Бина бик нык үзгәргән. Элеккеге белән чагыштыра торган түгел. Үзеңне шәһәр җирендәге кебек хис итәсең. Без теләгәнчә булган”, – диде күптәнге танышыбыз Нина ханым Юзеева.

Хезмәткәрләрнең  күбесе яшьләр. Юридик затларга хезмәт  күрсәтүче Ләйсән Гыйльметдинованың банкта эшли башлавына исә 17 ел була. “Бу чорда офис бик нык үзгәрде. Быел клинтларга якынаю өчен тагын да яхшырак шартлар барлыкка килде. Тудырылган уңайлыклар хезмәтебездән файдаланучылар артуга китерәчәгенә шикләнмәскә мөмкин”, – диде ул.

Банк яңа төзелеш объекты булып 1999 елның декабрендә ачыла. Шуннан соң  узган 23 ел эчендә бинада косметик ремонтлар гына уздырыла. Быел исә “Ремсервис” җәмгыяте реконструкциягә тиң капиталь ремонтны башкарып чыкты. “Моның өчен беренче чиратта җитәкчеләргә зур рәхмәт. Яңа форматтагы офислар ачылу филиаллар челтәрен яңарту программасын тормышка ашыру дәвамы. Бина эче танымаслык булып үзгәрде. Бары тик яңа җиһазлар гына куелды. Территория төзекләндерелде, алгы якка брусчатка җәелде, ишегалды фасадына асфальт түшәлә. Барысы да клиентлар өчен. Тәүлек буе эшләүче банкоматка “Зона-24” булдырылды. Халык соравын исәпкә алып, вакытлыча якындагы кибеткә күчерелгән банкоматны да алмадык, урынында калдырдык”, – диде офис җитәкчесе Исхак Галиев журналистлар белән әңгәмәсендә.