Бүген – Халыкара һәйкәлләр һәм тарихи урыннар көне

 18 апрель – Халыкара һәйкәлләр һәм тарихи урыннар көне. Ул 1982 елда ЮНЕСКО каршындагы Һәйкәлләрне һәм тарихи күркәм урыннарны саклау мәсьәләләре буенча халыкара совет ассамблеясе тарафыннан оештырыла. Девизы: “Тарихи ватанны саклыйк!”

Һәйкәлләрне тыңлыйк!

Җиңүчеләр калка һәйкәл булып,
Һәйкәл булып баса батырлар.
Ә батырлар үлми ике тапкыр -
Алар хәзер мәңге балкырлар!

Һәйкәлләрне җансыз дия күрмә,
Һәйкәлләрнең җаны таш түгел.
Һәр солдатта купме солдат җаны?! -
Һәйкәлләргә сыкрау хас түгел.

Гасырларның һәр минуты хәзер
"Бер минутлык тынлык" аларга.
Тып-тын алар шуңа.
Таш һәйкәлләр
Эчтән генә тиеш янарга.

Таш һәйкәлләр җырлый эчтән генә -
Бухенвальдта җырлый, Хатыньда...
Һәйкәл җыры -
Батырлыкка гимн -
Мәхәббәт һәм нәфрәт хакында.

Таш һәйкәлләр балкый эчтән генә,
Җырлый алар акыртын гына.
Һәйкәлләргә килик!
Гөлләр куйыйк!
Һәйкәлләрне тыңлыйк тын гына!

Роберт Миңнуллин