Мәгариф хезмәткәрләренең август киңәшмәсе
Бүгенге көндә районыбызның белем бирү учреждениеләрендә 1662 кеше хезмәт куя, шуларның 849ы - педагогик хезмәткәр.
Тагын өч көннән мәктәпләргә чакырып кыңгырау чыңлар. Яңа уку елы нинди үзгәрешләр белән башланып китәчәк, үтеп киткәнендәгесенең нәтиҗәләре ничек? Бу хакта бүген Саба мәдәният йортында 310 укытучы-тәрбияче катнашында сөйләштеләр.
Иң элек мәгариф идарәсе начальнигы Илфат Шакиров үзенең чыгышын алдагы уку елы проблемаларын ачыклауга һәм чишү юлларын табуга багышлады. Белем бирү нәтиҗәләре Бердәм дәүләт имтиханнарында күренә. 2025 елда XI сыйныфны 141 укучы тәмамлап, барысы да аттестат алуга ирешкән. Чыгарылыш сыйныфларда 75 укучы математикадан имтиханны – профиль, 66сы база дәрәжәсендә бердәм дәүләт тапшырган. Сайлап алу фәннәре буенча өстенлек җәмгыять белеме фәнендә. Имтихан буларак бирелә торган 11 предметның 9ы буенча нәтиҗәләр республика күрсәткечләреннән югары, физика һәм биология фәннәреннән түбән булган. Катлаулы сынау булып саналган математикадан –21, информатикадан 8 укучы югары балл җыйган. Укучылар санына карата процент нисбәтендә югары балл алучылар Эзмә, Югары Симет мәктәпләрендә күп исәпләнә. Шул ук вакытта төп дәүләт имтиханнары балаларга уку дәверендә дөрес билге куелмаганлыкны күрсәткән. Шуңа күрә, әти-әниләр һәм балалар үзләренең реаль белем дәрәҗәсен бәяли алмаганнар. Сынау тестлары нәтиҗәләре дә әлеге укучыларның төп мәктәп курсы өчен белем бирү программасын үзләштерләре шикле икәнлеген ачыктан-ачык күрсәтеп торган.
Бер укытучы да үзендә булганнан артык белем бирә алмый. Быел 126 педагогик хезмәткәр үз вазифасына туры килү буенча аттестация узган. “Алар үзенең эш системасы турында тулы бер хисап язарга тиеш. Асылы – үзеңнең эшчәнлегеңне төрле яклап анализлау, казанышларны һәм үсеш юлларын ачыклау. Әгәр инде укытучы аттестация узудан баш тарта икән, бу, күп очракта, аның эшчәнлегенең нәтиҗәле булмавын аңлата. Суземне укытучыларның квалификацион категорияләре буенча дәвам итеп, әлеге мәсьәлә мәктәп җитәкчелегендә нигә сорау тудырмый икән дигән фикер килә. Ун, егерме ел, аннан да күбрәк стажы, тәҗрибәсе булган Иштуган, Шекше, Тимершык, Юлбат, Түбән Шытсу укытучыларының беренче категориягә ия булмаулары нәрсә белән бәйле? Укытучыларның квалификация категорияләре профессиональлек һәм компетенция дәрәҗәсен күрсәтә. Аттестация узу зур методик эш алып баруны аңлата”, – диде Илфат Шакиров.
Тулырак «Саба таннары» газетасында
Следите за самым важным и интересным в Telegram-каналеТатмедиа
Нет комментариев