Туктар авылында яшәүче Мөхәмәтдин Ахияровны 90 яше тулган көне белән котладылар

 Мөхәмәтдин Ахияр улы  Туктар авылында гаиләдә җиденче бала булып дөньяга килә. Балачак, үсмер  еллары авыр сугыш елларына туры килә аның, шул сәбәпле, мәктәптә дә 4 кенә ел укырга насыйп була. 12 яшендә колхозда төрле эшләрдә хезмәт куя.

         1957 елда Кызыл Мишә кызы Наилә белән гаилә корып җибәрәләр. Ике кызларын, бер улларын бик яратып, кадерләп үстерәләр, югары белем алырга мөмкинлек бирәләр.

         Мөхәмәтдин абый 40 елдан артык туган колхозында тырыш хезмәт куя. Әтисеннән итек басу һөнәренә өйрәнә, күп еллар итек басып сата, Балык Бистәсе районы авылларында итек баса. Тормыш адәм баласын төрлечә сыный һәм Ахяровлар гаиләсенә дә төрле авырлыклар аша үтәргә һәм улллары Миннегаянны югалту ачысын да кичерергә туры килә.

         Хәзерге вакытта Мөхәмәтдин абый Һәм Наилә апа Туктар авылында төп нигезләрендә тигез, матур картлык кичерәләр. Озак яшәүнең серен Мөхәмәтдин абый тормышны сөюдә, һәр туган көнгә шөкер итеп яшәүдә күрә. Олы яшьтә булуына карамастан, кулында һәрчак яшьлек  дусты- тальян гармуны. Авылның бер сабантуе да аның тальяныннан чыккан матур, борынгы көйләрсез узмый.

         68 ел бергә гомер иткән Мөхәмәтдин абый белән Наилә апа әле һаман балаларына терәк-кинәшче, 6 онык, 4 оныкчыкның яраткан әби- бабасы. Мөхәмәтдин абый белән Наилә апаның тормыш сөючәнлеге, бер-берсенә булган хөрмәте һәркемгә үрнәк булып тора