Җылылык

Кыш җылысы – карның аклыгында,
Яз җылысы – аның ташкынында,
Җәй җылысы – парлы яңгырында,
Көз җылысы – алтын кырларында.
Авыл җылы – аны сагынганда,
Йөрәк җылы – сөю кабынганда.
Караш җылы – сөенечең барда,
Учак җылы –бергә кабызганда.

Кояш җылы – караңгыдан туйсаң,
Ай да җылы – ялгызлыктан туңсаң.
Җилләр җылы – таулар ышыгында,
Диңгез җылы – шәфәкъ сулышында.

Сүзләр җылы– син бәхетле булсаң,
Өең җылы – шикләреңне кусаң.
Көннәр җылы – шөкереңне әйтсәң,
Җаның җылы – намазлыгың җәйсәң...
Илмира Гыймаева.