Районыбызның үсеш фаразлары билгеләнде

Әлеге көн тәртибе бу­енча депутатлар, оешма, җирле үзидарәләр җитәк­челәре алдында Саба муниципаль районы башкарма комитеты җитәкчесенең икътисад буенча урынбасары Марат Ишниязов чыгыш ясады. Докладтан күренгәнчә, 2017-2019 елларда районның икътисадый үсеше 103 һәм 105,5 процент дәрәҗәсендә фаразлана, 2019 елга планлаштырылган үсеш 2030 елга кадәрге чорда районның үсеш стратегиясе кысаларында билгеләнгән чаралар исәбенә уртача республика динамикасын узып китә. Уртача сроклы перспективада икътисадый үсеш факторы булып сәнәгать һәм авыл хуҗалыгы тармагы торачак. Фаразланган чорга сәнәгать җитештерүе үсеше 103 һәм 107 процент дәрәҗәсендә планлаштырыла. Моннан тыш район башлыгының еллык юлламасында күрсәтелгән һәм үсеш Стратегиясе чаралары исемлегенә кертелгән күп кенә эре инвестиция проектларын гамәлгә ашыру планлаштырыла.

Болар - "Экопродукт" пред­прия­тиесендә сөт эшкәртү циклын яңарту, Иштуган сәнәгать мәй­данчыгында люпин эш­кәртү, "Саба-I" җи­тештерү мәйдан­чыгында биопрепаратлар (импортны алыштыру) җитеш­терү проектларын инвес­ти­цияләү һәм башкалар. Авыл хуҗалыгында үсеш темплары 106-107 процент дәрәҗәсендә фаразлана һәм уртача рес­публика темпларын сизелерлек узып китә. Моңа ашлык җыйнап алуны, ит һәм хәзерге көндә аеруча ликвид продукция - сөт җитештерүне арттыру нәтиҗәсендә ирешелер дип көтелә.