КФУ профессоры: Атлантикадан килгән циклон Казанга аномаль җылылык алып килде

Декабрьнең беренче декадасы Татарстан башкаласында аномаль җылы һәм карсыз булды. Айның икенче декадасында температура нормадан дүрт градуска югарырак булачак. Бу хакта бүген «Татар-информ»га профессор, география фәннәре докторы, КФУның метеорология, климатология һәм атмосфера экологиясе кафедрасы мөдире Юрий Переведенцев хәбәр итте.

«Бу атна аномаль җылы булды. Әмма 2008 елда шул ук вакытта температура 6 градуска кадәр күтәрелде, ә хәзер көндез 2 градус дәрәҗәсендә тотрыклы саклана (10 һәм 11 декабрьдә көндезен - Т-и иск). Хәзер Казанда тәүлеклек уртача температура -8 градус булырга тиеш, ә чынлыкта ул 2 градус җылы. Шулай итеп, аномалия якынча 10 градус тәшкил итә. Без Атлантика йогынтысында», - диде ул.

Переведенцев мәгълүматлары буенча, Россиянең бөтен территориясе шундый ук атмосфера йогынтысында. Шуңа күрә бөтен ил буенча шактый җылылык аномалиясе күзәтелә. Мәсәлән, Себердә мондый аномалия 18-20 градус тәшкил итә. Атлантик һава массалары Ерак Көнчыгышка кадәр җитә.

«Пәнҗешәмбе көнне температураның төшүе көтелә, әмма ул нормага якынлашачак кына. Россия Гидрометеорология һәм әйләнә-тирә мохитне күзәтү идарәсе фаразлары буенча, бу атнада көчле кар булмаячак. “Казан-Университет” метеостанциясе мәгълүматлары буенча, бу айда температура нормасы -8,3 градус, ә явым — төшем 55 мм, ә “Казан — Терәк” метеостанциясе мәгълүматлары буенча, 9,3 градус һәм 58 мм» - дип хәбәр итте спикер.

Россия Гидрометеорология һәм әйләнә-тирә мохитне күзәтү идарәсе фаразлары буенча, 12 декабрьдә көндез Казанда -5 градус, 13 һәм 14 декабрьдә көндез - 6 градус, ә 15 декабрьдә көндез -7 градус. Төнге сәгатьләрдә температура -9 градуска кадәр төшәчәк. Киләсе атна башында безгә янә җылы циклон киләчәк.

«Айның икенче декадасы нормадан дүрт градуска югарырак булачак. Тәүлеклек уртача температура -4 ... -5 градус була», — диде КФУ профессоры.

Фото: архив/Рамиль Гали

Чыганак: tatar-inform.tatar